政Whats噏:還押中被問「人生夠精彩未」 楊岳橋爆粗回應

·2 分鐘文章
楊岳橋曾講過擁有案底會令人生更精彩嘅言論。
楊岳橋曾講過擁有案底會令人生更精彩嘅言論。

前公民黨議員楊岳橋(AY)過往因失言而成日被嘲笑,喺2017年時曾經話覺得部分被判入獄嘅年輕人擁有「呢個案底令佢哋人生變得更加精彩」,即使佢已經就言論道歉,但仍然被翻舊帳。AY因去年參與民主派初選而涉違反《港區國安法》,依家喺荔枝角收押所還押,有指佢喺獄中被問到「人生夠精彩未」時,仲以爆粗回應添!

AY當年出席反新界東北發展案聲援集會嗰陣,提起話以前成日同犯事嘅後生仔講,案底對人生有好大影響,但又覺得因為反東北案同衝擊公民廣場而被判入獄嘅年輕人擁有「呢個案底令佢哋人生變得更加精彩」。AY爆出呢番言論後引起社會爭議,仲被質疑鼓勵市民犯罪,最後佢先解釋話失言同埋道歉。

最近47名民主派因參與35+初選而被控「串謀顛覆國家政權罪」,其中有部分人仍還押當中。被告之一、前民間集會團隊發言人劉頴匡女友今(7日)探監後,指劉頴匡喺收押所內以叫喊方式同其他人傾偈,仲有同AY講「點呀,人生夠精彩未?」,而AY就以爆粗回應。劉嘅女友就形容,佢哋係自嘲、苦中作樂。AY保釋被拒後,唔少人搵翻佢當年嘅言論,睇嚟佢當年都冇諗過自己會淪落到咁喇!