新加坡過江龍海南雞飯進駐港島 多款獨家限定 特色Kolo Mee乾撈麵

·2 分鐘文章

文華海南雞飯可以話係新加坡嘅國菜之一,繼尖沙咀開咗分店之後,而家港島區嘅朋友仔都可以好方便就食到喇!今次呢個新品牌,除咗有海南雞飯食之外,仲有多款新店限定,首次引入香港嘅新加坡特色麵食、粥品同甜品等。

首次引入香港嘅新加坡特色麵食、粥品同甜品等。
新加坡過江龍海南雞飯進駐港島!
新加坡乾撈麵
新加坡乾撈麵

餐廳主打多款獨家新加坡美食,本身尖咀店嘅menu菜式固之然會有,另外仲有唔少係得呢間舖先有得食嘅限定!好似乾撈麵咁,選用馬來西亞人氣Kolo Mee乾撈麵,非油炸又冇加防腐劑,感覺好似健康啲。呢隻乾撈麵本身口感較爽,師傅混入自家秘製嘅雞肉醬汁,令麵條帶有微微鹹香。兩款乾撈分別配炸豬扒同海鮮。不過出奇地兩款嘅口味食落都較為淡身,師傅解釋話因為知道香港人唔好太重口味,所以喺調味上係刻意調輕咗。

椰子雪糕咖央三文治
椰子雪糕咖央三文治

另一款當店限定更係必食推介——椰子雪糕咖央三文治!話說雪糕三文治係新加坡一種常見嘅街頭美食,師傅取其精髓,再加埋咖央餡喺烘過嘅三文治中間,而椰子雪糕更係自家以真‧椰子肉製作,食落會有啖啖椰絲,外脆內甜,冷熱交融,係幾有驚喜。

肉骨茶
肉骨茶

肉骨茶係充滿東南亞風味嘅美食,又點少得呢?呢度嘅肉骨茶湯底,加入白胡椒同蒜頭熬製,胡椒辣香味突出,而藥材味較輕。飲落甜甜地,仲有麵線搭配。

招牌文華海南雞飯
招牌文華海南雞飯

招牌文華海南雞飯就唔使多介紹啦,雞肉慢煮50分鐘,口感嫩滑。

「玫塊我愛你」
「玫塊我愛你」

飲品方面亦有新作,呢杯有靚靚玫瑰花瓣喺面嘅,係以新鮮椰子水、鮮奶同玫瑰糖漿調製而成,攪勻飲啖啖清甜,椰味甚香。不過係order嗰陣,叫個名有少少老尷囉,杯嘢叫「玫塊我愛你」,嗯。

Chatterbox Express
Chatterbox Express

Chatterbox Express
地址: 太古太古城建安閣地下G515號舖


文、相、片:Kar