方芷欣帶傷勁舞 博入《造星Ⅲ》10強

正在熱播的ViuTV節目《全民造星III》，20位參賽者力爭10強席位，葉巧琳及鍾諾言（NY）前晚率先入圍。有份參賽的方芷欣（方方）因舞蹈出色獲網友睇好出線，她自爆受坐骨神經及膝頭關節萎縮問題困擾，今次可謂搵命博！至於Angelababy師妹張凱娸（KiKi）雖然已出局，但就獲導演谷德昭及彭秀慧睇中邀拍戲，另闢一條新血路。

現年25歲、舞蹈員出身的方方憑出色舞技殺入20強，獲網友睇高一線，有望成為10強。入行7年的她曾為歌手杜德偉、草蜢及陳小春演唱會擔任舞蹈員，她接受本報專訪時自揭「身世」，自爆當年中學文憑試成績只得3分，自知不是讀書材料，所以把心一橫入行做舞蹈員。

方方跳舞跳到周身傷，原來更有腰椎間盤突出、坐骨神經及膝頭關節萎縮問題，醫生曾勸她避免做劇烈運動，但她仍為參賽搏到盡：「因為關節磨蝕比復原快，呢啲舊患一直跟住我。醫生叫我唔好再跳得咁激烈，話我老咗會行唔到，但為咗比賽冇理！」對於有望殺入10強，她坦言是意料之外：「本身以為30強會走，入到20強好驚喜！因為我份人挑剔又冇乜自信，身邊嘅人好多優點我都冇，想學佢哋，但又做唔到。」

KiKi獲導演點名讚

另一參賽者KiKi顏值高又自彈自唱，同樣被睇高一線，無奈節目中與隊友經歷不和事件，一度成為眾矢之的，但「因禍得福」，人氣不跌反升，獲網民捧為「造星女神」。雖未能進身20強，但她獲導演谷德昭點名力讚，又獲彭秀慧開口邀拍新片，她直言：「入嚟係想挑戰自己，發掘更多可能性，做個全面演員。」至於ViuTV主持李昭南雖然憑性感椅子舞殺入50強，惜40強止步，她坦言有少許失望：「未發揮到強項就走咗，嚟緊會多啲拍片唱歌，等大家睇到我呢方面嘅才能。」

顧定軒慘被淘汰

在前晚播出的10強爭奪戰中，顧定軒以「唱歌劇場」迎戰葉巧琳，但不敵對方的超水準唱功被淘汰。而張右雨與NY以跳唱對決，勢力不相伯仲，最終NY順利進身10強。