星空下的仁醫︳姜麗文演病童媽大獲好評 曾為情所困患抑鬱症

TVB台慶劇《星空下的仁醫》雖然收視平平，但係外間反應唔錯。前晚一集講述BB女睿睿唔舒服，但係由於病癥唔明顯而無人理，睿睿媽咪（姜麗文飾）仲要喺橫風橫雨之下跌低。後來有馬國明飾演嘅況叢昕幫手，搵到心胸肺外科醫生章以芯（鍾嘉欣飾），終於證實睿睿心臟有事。鍾嘉欣同姜麗文一場對手戲，令網友大表欣賞。

之前姜麗文(Lesley）拍《愛．回家之開心速遞》演外傭Liza已經被讚夠神似，今次再備受讚賞，入行11年終於有回報。

姜麗文同哥哥姜文傑(Benji）嘅爸爸係資深演員秦沛，由於父母離婚，Lesley同哥哥自細喺加拿大成長，爸爸留喺香港拍戲賺錢，Lesley細個都會跟埋一齊開工。19歲時Lesley透過契媽翁倩玉搭路同日本經理人公司簽約，曾經係NHK電視台兒童節目主持。

後來因為簽證問題Lesley決定回港，並且同哥哥自資做歌手，又拍過HKTV劇集《第二人生》及《三面形醫》等。雖然爸爸係無線出身，哥哥Benji亦做過TVB音樂節目主持，但原來Lesley到2017年先同TVB簽約。《愛．回家》以外，Lesley亦拍過《街坊財爺》、《踩過界II》等劇集。

傳過同鄭俊弘拍拖嘅姜麗文，曾經公開分享自己患上抑鬱症嘅經歷。Lesley透露7年前經歷過感情創傷，情緒大受影響，曾經寫定遺書，後來因為諗到首歌嘅編曲處理而打消念頭。Lesley之後以運動等方式改善狀況，去年初更宣布同圈外男友結婚。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！