星空下的仁醫|演員卡士吸引 網民憂偏離主題變《星空下的戀仁》

《星空下的仁醫》劇照
《星空下的仁醫》劇照

無綫台慶劇《星空下的仁醫》喺前晚(18日)開始播映,劇集以兒童醫院為題材夠晒新鮮,而演員陣容亦非常鼎盛,包括有鄭嘉穎鍾嘉欣馬國明、周家怡及羅子溢等人主演。想知網民們睇完頭兩集有咩感受?快啲轆落去睇下啦!

演員卡士吸引
《星空下的仁醫》演員陣容強大,先係鍾嘉欣榮升媽媽後首度出演女主角角色,久未喺TVB露面嘅周家怡與鄭嘉穎亦再度與TVB合作,聯同馬國明演出,將會係鄭嘉穎與馬國明兩位視帝繼2010年《鐵馬尋橋》後再次合作。唔少網民都話被演員卡士吸引,紛紛留言話:「鄭嘉穎+鐘嘉欣,唔睇也不可能」、「馬明,鄭嘉穎,鍾嘉欣呢三個正」、「鄭嘉穎 ,馬國明,鍾嘉欣,周嘉怡=好戲連場」、「​​好耐冇睇過鐘嘉欣同218,吸引到我去睇」、「演員陣容好吸引,馬明,嘉欣,嘉穎好好睇!拍攝認真。唔錯」及「我會睇呢套劇,得一個原因… 鄭嘉穎 ! 佢的確係好有吸引力!」等等。

手術場面逼真
劇集播出兩集就已經有唔少搶救及手術鏡頭,唔少網民都話手術場面夠逼真,例如「手術鏡頭使唔使咁逼真仲要大特寫」、「好緊湊,一集已經做了幾個手術。好睇」、「好睇啊,製作好認真」、「宜家醫學劇啲血腥手術場面咁真實,真係好..」、「勁!今次d手術場面比白色強人更真實更細緻! 睇到”嘩”咗幾次! 超贊!」及「真手術畫面有啲驚睇到」等等。

唔好變愛情劇
無綫過往有好多劇集明明唔係愛情劇,不過劇情都會慢慢偏離主題,拉到去有好多感情戲,所以唔少網民都認為劇集有機會變做愛情劇,留言話:「頭幾集應該ok 之後又變追女」、「已經唔想睇醫療 / 紀律部隊 / 律師戲,仲要大部分時間情情塔塔」、「咪又係2成醫生包裝嘅8成愛情劇。 悶。。。」、「之後20集就星空下的戀仁」、「永遠第一集都係大龍鳳好緊張刺激,之後就慢慢分枝感情大兜亂,慢慢偏離劇集主題」、「第一集講醫院 中間23集講多角戀 最後一集危機處理 全劇完」、「第一集懶勁咁,跟住就係愛情片,和醫院無關」及「希望唔好發展到星空下的仁醫愛情故事, 幾個醫生又住埋同一間屋呢類食老本劇情」等等。

馬國明又做醫生
馬國明自1999年入行以嚟飾演醫生嘅次數多達14次,由古代演至現代,而今次佢喺劇中飾演小兒外科顧問醫生況叢昕Amos,一班網民都好好奇佢有邊個部門係未做過,紛紛留言「馬明你再扮醫生就打X你」、「馬國明第幾次做醫生?」、「仲有邊科醫生未做?」、「馬明仲有咩科既醫生未做過,繼續演」及「馬明又做醫生,睇到有啲亂」等等。

鍾嘉欣仲係好靚
今次係鍾嘉欣事隔三年再有劇集播出,所以唔少網民喺劇集未出街之前已經話好期待。劇集出街後,唔少網民都留言大讚嘉欣仲係好靚同睇得幾舒服,例如「冇見嘉欣咁耐 仲好靚」、「中+欣仲係好正」、「鐘嘉欣做呢啲角色咪幾好,好過之前啲喊包」及「我好少睇鐘嘉欣,佢真係幾好,睇得幾舒服」等等。

《星空下的仁醫》劇照
《星空下的仁醫》劇照
《星空下的仁醫》劇照
《星空下的仁醫》劇照
《星空下的仁醫》劇照
《星空下的仁醫》劇照

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!