星空下的仁醫｜鍾嘉欣痛失BB喊戲好揪心 網民支持奪視后

無綫台慶劇《星空下的仁醫》正在熱播中，唔少劇中演員發揮高水準，噚晚鍾嘉欣出色嘅演繹更獲得大批網民留言讚賞，更支持佢拎今屆視后。

噚晚劇情講到Eman（鍾嘉欣飾）腹中胎兒受到感染，需要接受緊急手術，Eman喺手術期間一度心跳停頓，好彩最終搶救成功，而BB就喺拎出嚟嘅時候已經無心跳。喺手術後，Eman喺醒返嘅時候見唔倒BB，焚爺（鄭嘉穎飾）將BB已離世嘅消息話比佢聽，喺見到BB遺體時Eman變得非常激動及自責，話係自己害死BB。焚爺唔忍心見到佢咁，所以就聲稱係佢失誤害死BB。去到尾段，Eman向焚爺承認知道自己有幻覺，不過真係好唔捨得BB，唔想自己咁清醒。

今次《星空下的仁醫》係鍾嘉欣榮升媽媽後首度再出演女主角，佢喺噚晚嗰集嘅演繹簡直係演技大爆發，唔少網民都留言大讚佢演得好好及支持佢拎今屆視后，例如：「你演得好好，好入戲！今年視后如果唔係你就真係天理難容」、「希望你拍多啲戲，次次都俾你搞到喊」、「看到熱淚盈眶，撐鍾嘉欣做今年視后」、「到你拎啦，視后」、「嘉欣你做得好好呀 呢集我真系（係）睇到喊」、「真心希望妳今年可以攞到視后，演技滿分！！」、「哭死我了，真的很揪心。」、「演的非常好，看了很痛，也哭了」、「希望今年視后係你」、「好喜歡妳演出，好投入，好 touching」、「嘉欣演喊戲真係一流」及「今集你演得好，呢套戲你演技比以前進步好多，希望你拎到獎!更希望睇到你以後作品」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！