是日噏day：價值觀大不同

身邊有位朋友，發覺自己同伴侶睇事情嘅方法好唔同。已經去到談婚論嫁嘅階段啦，朋友深入面嘅疑惑係——究竟應唔應該同呢個人結婚。

討論之間，另一位朋友提出左好多人於上呢個問題時都會講嘅一句說話：「情侶根本冇可能100% match，睇下大家點樣遷就嘅啫，可以和而不同架嘛。」

呢一句出於善意嘅說話，經歷過情侶爭吵嘅人，大概聽過唔少次。但我好懷疑，呢句說話嘅作用可以去到有幾遠幾廣。

「無人100%match」呢句說話，似是而非嘅地方在於，佢係一定啱嘅。伴侶間，的確總唔同嘅地方存在。但係，用呢句說話去叫人就算明明唔夾，都繼續喺埋一齊，其實同冇講過野，亦都無分別。就好似另一句一啱嘅說話「無人科科都攞一百分架喎。」如果第時生左個仔，佢咁樣同你講，難道就證明到，佢每科都只係攞得3、4分，係一件合理嘅事咩？

咁即係話，我「無人做到十全十美」呢句說話，係廢話。咁事情嘅重點應該係，攞幾多分位為之離晒大譜先？攞幾多分又為之可以接受先？係咪？所以考試，先有「合格分數」呢回事。

但係價值觀呢樣野，可唔可以用打分數去量化呢？似乎又唔得。所以與其嘗試用分數去衡量，倒不如將呢樣嘢化為一個問題——「伴侶同你有所不同嘅價值觀，係咪已經去到一個你會睇唔起佢嘅程度？」

試諗下，
如果一邊覺得食狗肉冇問題，另一邊係愛護動物；
一邊係非建制政治主張，另一邊係撐政府；
一邊係恐同，另一邊係贊成同性婚姻合法化；
一邊係孝道至上，另一邊係對傳統家庭觀念非常抽離的；
一邊係覺得賺到錢應該要用黎投資，另一邊就覺得應該要用嚟旅行玩樂；
一邊係歧視有色人種，另一邊討厭人種族歧視……
咁，會發生咩情況呢？

當然，和而不同呢回事，係真實存在嘅。例如一個10年先見一次嘅小學同學，佢對任何事情、人生，如果同我有南轅北轍嘅睇法，一次飯聚兩個鐘，當然完全OK fine啦。我下次見佢，可能已經係20年之後。佢點睇事情，我理鬼佢咩？咪和而同囉即管！

但如果一個咁遠距離嘅關係，換為一個極親密嘅關係—— 一與你下半生每晚都要訓係佢隔離咁近嘅枕邊人嘅關係，就完全唔同講法了。

如果佢嘅立場同你唔同，但係嗰個立場，其實係你心目中都唔係咁重要嘅啫，咁咪冇問題囉。(例如你係反對人食狗肉，但心底裏面就算有人食狗肉，你又唔會真係好嬲）

但相反，如果對方嘅對立立場，係去到一個令你睇佢唔起咁嚴重嘅程度，咁你覺得，呢個無錯冇可能同你100%match嘅伴侶，你仲有冇可能同佢「和而不同」丫拿？

所以，如果你已經暗暗地感覺到，你同伴侶之間有價值觀嘅衝突，與其一開始就諗點樣遷就，不如先搞清楚一件事——就係佢存唔存在一啲你根本睇佢唔起嘅特質。諗好咗呢個問題，起碼過咗嗰個等於「合格線」嘅合格條件，先再諗點樣和而不同啦，好嗎？

text by Tyler Li (facebook: 泰兄）

（圖片來源：Toa Heftiba）