是日噏day：愈將形象經營成悲劇角色 愈易遇上呃你的男人

唔少人好鍾意將自己，經營成一個悲劇主角嘅形象。點解會用「經營」兩個字呢？

因為唔開心來講，一啲會選擇暗暗地唔開心，一啲人卻會選擇悲傷得好高調。
而認了吧，當你選擇經常將悲傷公諸於世，同時間你根本一邊等待緊某某前來慰問安撫。

最常見當然係喺社交網絡，大量發放悲情嘅金句——「為何善良的人總被人利用？」、「越成熟越懂得誰才真心對自己好，我不知道這種成長是好事還是壞事」、「不知道為何忠誠，總是換來被欺負」、「我要的只是簡簡單單的快樂，真的有那麼難嗎？」

其實去marketing自己，一啲都無錯。做人冇marketing ？死得啦！個問題反而落咗係，你個marketing strategy，方向究竟啱唔啱先？

有幾位玩開「傷春悲秋」形象嘅男仔，不約而同同我講，呢種形象，的確溝到下女。無可否認女性喺母愛嘅天性影響下，確實容易對唔開心嘅男仔，產生被需要嘅感覺，有着一種吸引力。

但另一邊廂，時常公開地發放悲傷情緒嘅女仔，佢又面對著另外一種命運——就係佢哋引親埋身嘅仔，都係一D 19 player。而遇得越多19 player，佢哋就越多悲傷情緒繼續發放，周而復始，越窮越見鬼。

點解會咁呢？

因為男人一般唔具備偉大嘅母愛，當缺乏左呢樣野，正常人都唔會希望身邊長期嘅伴侶，係一個負能量發放機。唔係話每個男人都只係鍾意開心天真妹，但如果你嘅形象，已經經營成每一日都有唔知邊度嚟嘅負面情緒，有幾多個男人會想日日做垃圾桶幫你食晒佢先？

呢類男人走左，咁邊一類會行埋黎呢？就係想食你嘅19 player囉。向負能量女埋手，有咩好呀？

首先，你成日講到俾人呃，咁即係你好易呃啦。騙徒知道有條友經常受騙，咁就緊係揀佢黎呃啦係咪先？

第二，你唔開心吖嘛，咁梗係想有人安慰，埋你身就特別容易啦，咁19 player安慰你，同你混熟，起碼易過正常女仔一倍啦。

第三，你唔開心，就梗係空虛寂寞同埋凍架啦。唔止易傾計，更加特別容易約出嚟。約到出嚟，想有人陪下自己嘅心態，分分鐘你想黐住對方多過佢想黐住你，咁就更加易得米啦。

第四，長期唔開心嘅人最鍾意做咩？飲酒囉。又咁啱唔開心嘅人飲酒又特別容易飲醉。作為一個成年人，飲醉咗最容易發生啲咩，你懂的。

第五，飲醉咗酒，會將負面情緒進一步釋放。釋放時你又想有人陪，想有人攬下自己，咁嗰晚最容易攬左去邊呢？

最後，第二朝一醒，你有冇突然之間由一個負能量之王，突然有咗180度嘅轉變？
無。咁19player會唔會埋單呢？又唔會。咁之後你又更加覺得好慘，繼續係社交平台發放悲慘金句，咪又再引多啲19player來安慰你囉。

所以，千祈咪以為悲情形象，會吸引到好人的關懷。男人無母愛架！

我覺得，唔開心唔需要特別扮開心，但係下下經營出一個悲劇主角嘅形象，又係唔係好事呢？做人冇marketing 死得，搞壞左個marketing引來唔係你想要嘅人，其實死得仲快。自己諗諗。

text by Tyler Li (facebook: 泰兄）