是日噏day：揪住（想像嘅）矛盾去剪片？

全球最鍾意捉人英文唔好，就係母語並非英語嘅香港人。例子係咩呢？你睇新電視台星期一、二，連續兩晚播出連詩雅vs葉蘊儀嘅《跟住矛盾去旅行》。喺新台不論電視又或者網上嘅宣傳片段嘅推波助瀾下，成功將連詩雅化身ABC港女，話佢講嘢硬係要加d英文，網絡隨即跟機插爆。

但我想講——
第一，連詩雅究竟係咪真係唔識英文，但硬係要講英文扮ABC呢？
第二，佢加插英文嘅情況，比起正常香港人又係咪真係咁over呢？
第三，若果唔係真係特別比人差，點解大家今次又會咁一呼百應呢？

首先利申，勁鍾意葉蘊儀，亦撐ViuTV。
但問題係， ViuTV剪片嘅工作人員，確係剪得有心機，但係心地就唔係幾好嘞。

其實如果有睇節目，唔係淨係睇宣傳片段嘅話，唔難發覺其實連詩雅說話中夾雜嘅英文，唔會比葉蘊儀講野時夾雜嘅英語用詞多得好多。講緊嘅，唔係想拉埋葉蘊儀落水，話佢都係偽ABC。想指出嘅係，根本香港人，普遍嘅文化就係講嘢時中英夾雜。唔係要扮西化，但係當大家英文程度都基本聽得明，好多時講嘢根本自自然然就會拌雜住英文。

再者，有好多詞彙，中文的確有對應嘅講法，但係用英文表達埋所承載嘅文化背景，先至夠精準。當然有時都係因為英文一個字，就等於成抽中文字先表達到嘅意思，呢D位，大家都會貪方便用英文。

至於連詩雅，係咪明明唔識英文但係扮識英文呢？呢個錯覺，係源自於當年嘅「rest in piece」事件。大家覺得：「哇！『rest in peace』咁簡單都串錯，你啲英文肯定好垃圾啦！」但實情係，根本好多香港人就係坐井觀天。我認識好多鬼仔鬼妹，母語係英文，但係佢哋串字嘅能力係低到不能。你叫佢哋寫英文，錯字嘅頻率密到飛天。

所以，當平時外國人都唔識多個嘅香港人，見到人串錯字，又係黃皮膚，就會覺得人哋英文差。所以我成日都話，全世界最鍾意捉人哋英文差，話人定英文好嘅人，全部都係母語唔係英文但係又識少少英文嘅人。喺外國，你講非常差嘅英文，根本無人會care。佢哋聽得明你講嘢已經OK，仲會好欣賞你識得講少少英文。

至於連詩雅嘅英文程度，佢根本就係英文叻過中文好多，讀國際學校嘅佢，根本中文唔叻，曾經聽過朋友講，點擊率極高嘅『到此為止』YouTube 片，連詩雅用手一張一張揭嘅歌詞咭，係佢望住啲字，好似畫公仔咁「畫」出黎嘅，歌詞入面好多字，佢根本唔識寫。

一個本身英文好過中文嘅人，講中文夾雜住英文，原來就係情有可原嘅事，再加上佢加嘅英文已經唔算特別多，咁究竟大家究竟鬧咩呢？家陣佢又唔係真係「well，you know what，xxx」之後先講番中文嗰隻。定係你覺得鬧完別人英文唔好，自己英文就會好咗丫？定還是自己英文得半桶水，就要佢英文都同我一樣半桶水，咁樣先開心呢？佢夾住講嗰堆英文算幾淺白，你唔係同我講你突然龍的傳人上身，聽唔明下嘛？

又或者再好玩D，你唔隔住個mon鬧，又夠唔夠膽面對面同連詩雅用純英文對話半個鐘？唔准知道佢識聽中文，有D詞語你自己唔識用英文表達又或者口快快時，學人「夾雜少少中文」講喎？唔係話唔准溝埋黎講野架咩？點解我知你唔敢？因為真係英文叻嘅，好少咁無聊捉人英文好唔好架。

第二樣要講嘅，係節目嘅剪接手法。製作節目要有張力，要有上下把位先好睇，明嘅。但係剪接手法，例如剪一啲無前無後葉蘊儀類似黑面反眼嘅碎shot，放喺一啲你想觀眾覺得連詩雅有問題嘅情節後面。係有心機，係好睇⋯⋯但係無中生有，淨係「跟住你想像嘅矛盾去剪片」，又會唔會勁得滯呢？宣傳片亦將佢夾雜嘅英文，喺螢光幕用字打出黎刻意強調一番，至於節目中係咪密到咁呢？又唔覺。

個節目明明見到就係，葉蘊儀周不時語重心長同後輩分享自己經驗，又或者連詩雅好恭敬咁同前輩傾緊計。但係剪接上，就偏偏要營造到葉蘊儀好似後生女做咩都睇唔順眼嘅老而不咁。點解要咁樣搞我女神呢（我指葉蘊儀）？

喺呢度，比少少意見我其實係撐嘅新電視台。做呢類真人騷節目，要營造上下位置嘅張力。選人選呢步好重要，最好真係搵一個將自己市場定位放喺下把位嘅藝人去夾，如果唔係嘅話，將兩個唔想自己形象變到咁嘅人，夾硬賣人豬仔剪片又或者做宣傳片做到咁，你估下次，佢哋仲肯唔肯上緊節目丫拿？除非你之後做到好似以前舊台咁，惡都冇人敢抵抗你，就可以喺一個大家都做得唔開心嘅情況底下，進行到件事囉。

否則，玩到無晒朋友，長遠只會有本身自己市場定位，已經喺下把位幾藝人想上你節目（搵多次周永恒囉)，咁又何必呢？

(圖片來源：ViuTV網站及節目截圖)

text / Tyler Li