雅虎香港新聞 是日噏day：《 點五步》將憤怒，向無可奈何的生活擲出去！
上星期睇咗港產新片《點五步》，在此不打算談薪酬爭拗（雖然直覺反而愈拗愈有票房)，還是純粹以戲論戲吧。套戲瑕疵係有，但仍然觸動到我，至少係劇情推進去到高潮位嘅時候，我眼睛濕了一大片。
因為套戲仍然上畫當中，唔想打擾大家睇呢套戲嘅觀感，盡量唔劇透，僅僅談及一啲想當然耳嘅劇情。例如一啲不難預料嘅故事情節：球賽啦、訓練啦、爭勝啦。
但如果以為電影嘅野心，只係一套僅此而已嘅電影，係睇少咗佢。其實以上所講，統統都只不過係包裝。電影真正嘅主菜，係講述「成長」——第一次啟蒙一般，首次學懂往後人生老是常出現嘅一件事，叫「無能為力」。
著墨更多嘅，係幾個屋村仔，由以為自己往後嘅人生無所不能，蛻變成一種半成年嘅狀態，理解到，人生就係由無數不得不如此嘅交錯所組成。即便如此，仍然別無選擇地勇敢走下去，唔係正正就係是他也是你和我咩？
作為一個最怕肉麻老土嘅觀眾，最叫我欣賞嘅，係呢套電影的確係賣熱血，但唔係賣夢想。
因為用棒球運動包裝嘅幾條人物故事人物故事線，本來就談唔上有咩一早已經預設諗好嘅夢想要追要捉。見到更多嘅係，一班泥沼內嘅細路，傍偟浮沉，連幻想起自己想去嘅地方，都彷彿好奢侈嘅一種狀態。
泥沼入面，掙扎同時無處著力之時。突然失驚無神唔知邊度伸支盲公竹黎，叫做校長叫做棒球隊。有了著力處，終於有樣野可以恨恨地抓住，即使呢個夢一開始唔係自己主動去追；即使返到現實生活仍然是那麼無可奈何；即使係球場以外自己嘅性格命運仍然係懦弱仍然係錯失機會——但係有那麼一瞬間，終於有一級踏實嘅階磚出現，俾你自己死唔認輸地用力向上漂亮地撐一撐！
所以呢部電影，題目係成長。
劇力推進到最高點，主角嘅意識，聚焦喺呢份往後人生必將不斷重複嘅無可奈何之上。
決勝時刻，主角手入面握著嘅棒球，全個世界，他只有它，它也同樣就只有他，相依為命地連結在一起。
各個故事嘅支線、人物，同一時間都正在為自己做過嘅事「去還」，都繼續着嗰條命定嘅路線。
主角都唔例外，但喺球賽進行嘅時空，居然能以純粹嘅競技，係嗰條難以逆轉、充滿無力感嘅路途上，得到一個短暫嘅假期、一服暫時性嘅鎮痛劑，佢仲可以唔認輸——至少在球場上。
所以電影高潮嘅一記投球，係將生活嘅憤怒，拌雜住懦弱者嘅一胸悶氣，連同棒球一同狠狠地擲出去。
心中怒呼一聲：「點五步！」，成好敗好，都換來奮力而為嘅快感。一切完結之後，又要返翻去命定嘅人生嗎？係之後的事了，唔理了，呢一刻，我只想專心投好呢一球。
對於長大左嘅成年人，究竟有幾耐係呢個層面嘅精神意義上，未放過一個小休，反倒keep住係「明明我已晝夜無間踏盡面前路」咁樣樣呢？
但無論如何，決勝時刻嘅嗰一記投球，作為觀眾，我連同自己嘅情感同回憶，都一齊投擲埋出去，係有發生過嘅觀影體驗。
至於片尾「雨傘」嘅片段，如果觀眾本身對「雨傘」有感， 就算冇加插呢啲片段，好自然都會將嗰份感覺連結埋一齊，導演嘅處理手法算係有少少畫公仔畫到出埋腸，但我亦唔算有反感。
PS1：筆者自小住喺故事原型基覺小學幾步之遙嘅地方，從來冇聽過呢個關於沙燕橋嘅故仔，感謝電影俾我知道有一個關於我長大嘅地方，一個咁有趣嘅故事。
PS2：如果你係沙田友，電影入面出現嘅校服，禾輋邨嘅實景，又或者係娛樂城嘅波樓，都一定令你睇得過癮。
PS3：完場謝票嘅活動，確實係驚喜，有活力又具誠意。
PS4：談善言Hedwig Tam好靚女，五官精緻而不落俗套（所以用左黎做opening相）。
PS5：入場吧！部戲有錢賺，炒蝦拆蟹嘅朋友，睇下導演陳志發會唔會走數都好丫嘛！
Text by Tyler Li
（圖片來源：opening image by willallwailam from Hedwig Tam 談善言 facebook；《 點五步》劇照）
