【曾精神出軌】王君馨自爆婚前戀上同劇男藝人 幸及時向男友坦承

近排好多藝人都開設個人影片頻道分享生活點滴，當中包括王君馨（Grace），佢喺個人影片頻道上載影片「君馨的愛情故事 My Love Story 」大講自己同老公Daniel嘅愛情故事。影片喺噚日出咗下集，Grace更喺片中自爆曾經精神出軌，戀上同劇男藝人。

王君馨同老公由拍拖到結婚一直都好恩愛，結婚到而家3年幾仲好似熱戀中咁，成日喺社交網站放閃。老公更為咗Grace由美國搬到香港定居，仲犧牲埋個人事業，因為唔想再承受Long D之苦。

外人睇落好幸福嘅一對，但王君馨日前突然係影片中話當年佢同Daniel頂唔順長期Long D嘅生活，仲曾經分開3年半。當時佢成日好想男朋友喺身邊，可惜Daniel喺美國，令佢好寂寞，後來因為信仰才再次一起。Grace仲大爆自己曾經精神出軌經歷，對方仲要係同劇男演員。當時佢同嗰位男演員每日都會見面，會日日諗住佢，睇劇本都會諗住，拍劇都係諗住佢，之後發覺會想照顧佢，想見佢多啲，連發夢都見到佢，Grace知道要停一停。

Grace直接將自己精神出軌話畀Daniel知，當時Daniel好嬲同緊張，於是Grace就承諾佢三點。第一，除咗拍劇食飯，唔會同呢個人單獨出嚟食飯；第二，喺對話中要經常提起Daniel；第三，如果Daniel返香港想見呢個人，佢可以安排見面。

另外，Grace喺臨結婚前又遇到另一位基督徒對象，好彩身邊姊妹幫佢祈禱渡過難關。Grace同Daniel一次又一次度過考驗，令佢哋結婚至今仍然非常恩愛。