【有樓唔憂賣】唔准睇樓的理由:孕婦的風水,業主的吹水,房間的漏水!買家要醒水?

黃美雲
·4 分鐘文章

以為世界艱難,原來豪宅唔憂賣!

陪女朋友去睇樓,單位在半山,一千七百呎,叫價三千多萬。

最初業主不准睇樓,後來終於肯了,我們甫入屋,只見大廳牆上到處是木——不同時代,顏色、種類的木,殘殘哋。

「點解咁多木?」朋友問。

「係設計風格。」男戶主答。

「呢邊玄關位嘅,係咪木櫃嚟?」

「唔係,係裝飾。」

朋友眉精眼企,知道牆是鄰居的廁所,這些木板應該是遮住隔壁漏水痕迹的。

「我哋可以睇吓主人房嗎?」朋友問。

「唔可以,我太太有咗。」業主答。

「哦!咁可以睇乜呀?」

「工人房。」

只見工人房更有趣,一個角落被一大塊帆布遮住。

「請問點解有塊帆布嘅?」

「啲牆磚唔靚囉。」

業主嫌朋友問得多,丟下經紀招呼我們。

「小姐,我求咗個業主成三日,佢先畀我哋睇樓咋。你買唔買呀?」經紀問。

「你覺得我有睇過樓咩?我想睇啲櫃、啲渠、啲套廁、啲去水位,全部都唔准。主人房又冇得睇。」朋友好不滿。

「女主人大肚,開啲櫃門房門會衝撞吖嘛!」

朋友轉頭來問我:

「開門係孕婦大忌咩?」

「風水上,冇聽過孕婦不宜開門喎,佢平日喺間屋內生活都要開門㗎啦。」我答,然後輕聲跟朋友說:

「宅主咁小心,就唔應該放盤啦。孕婦不宜搬屋噃。」

「乜陀B唔好搬屋咩?」

「孕婦的確有唔少避忌㗎,例如唔好搬屋、搬房、搬床、搬灶,會動胎氣,恐有意外,聽講小則肚痛,大則流產。孕婦需要一個安靜,冇煞氣嘅環境養胎同養好心情。搬床固然唔好,床上有雜物都唔好,床單要整潔,有個朋友大肚時,因為懶,啲床單穿咗窿仍然用,結果B女生出嚟個頭頂有一塊地方冇頭髮,後來長大咗先生番出嚟。唔知係咪巧合啦。仲有,唔可以接觸利器,我有朋友懷孕時床頭有一把較剪,結果男嬰出世時隻耳仔崩咗。當然屋內絕不宜裝修、動土啦,釘粒釘都唔好呀。」我答。

我朋友此時轉向經紀說:

「講到釘,工人房咁大塊帆布,用咗百多粒窩釘鏍絲,而且分明係新釘上去嘅,咁又唔忌?呢啲唔係風水,係漏水!」

結果呢,當然係不歡而散啦。而那位備受嬌寵的孕婦,不知是神秘的人口,還是業主的藉口!

作者:黃美雲

黃美雲小姐(Ms. Amy Wong)有豐富公關廣告經驗,現為廣告公司合夥人,亦是Media Training及溝通技巧的培訓專才。

黃小姐研究玄學多年,並根據其豐富的商場經驗,融會形象包裝、掌相學、望診學、身體語言、溝通技巧、談判策略、危機管理等學問,編創了「極速性格解碼學」課程,為行政人員提供另類管理智慧。她先後為渣打銀行、香港中華煤氣有限公司、賽馬會等主持培訓課程。

曾以黃愛媚的筆名,在報章雜誌撰寫專欄,出版的書包括《公關十八般武藝》。

Related Articles:

【下午茶文化禮儀】不學禮無以立,紳士淑女是要練出來的!今期食譜:西蘭花薯蓉植物肉香餅

【三八婦女節】僱主僱員共建性別平等職場!TEC女高管:年輕女性亦可闖出一片天!

【疫下真面目】大企業疫下賺錢仍裁員減薪?雪中送炭非不能也,實不為也!


Follow us on facebook: https://www.facebook.com/etnet.com.hk/

etnet財經‧生活網(www.etnet.com.hk)提供全面及專業的財經新聞及資訊,包括為用戶提供免費實時股票及期貨報價、專家點評等。同時《生活副刊》頻道,涵蓋財智、管理、世事政情、健康養生、消閒購物及數碼科技等資訊,盡享健康樂活之道。於2014年更推出《DIVA 品味派》潮拜頻道,集五大品味內容及視頻專案於一站 - Fashion、Beauty & Love、Watch & Jewelry、 Art & Living及 Travel & Dining,日日更新,秒秒矚目。