有潛質上位小花 有冇一個係你心水？

自鬧出小生花旦荒之後，可以擔大旗嘅演員越來越少，無綫都好擔心冇人接棒；加上劇集嘅收視近年更加不斷下跌，雖然無綫明白唔可以一世靠一眾老戲骨搶收視，所以開始培養新人接棒，好似陳凱琳、蔡思貝等人。可惜可能曝光率太高加上演技太幼嫩，佢哋每次一出場就俾人鬧。咁不如試下考慮下面呢批獲得唔少好評嘅女演員接棒啦！

朱千雪
2012年選港姐嘅時候就已經深得民心嘅朱千雪，雖然贏唔到冠軍，不過唔少網民都話佢：「這簡直是宅男女神」、「她不是聰明那麼簡單，我簡直見到一些智慧」、「笑容有大將之風，自然舒服」、「我喜歡朱千雪，笑起來好有親和力，現場答問題又表現淡定」等，所以被稱為「民選冠軍」。而佢第一次喺《EU超時任務》擔大旗做女一又被大讚演技！人又靚、演技又好，前途無可限量！

湯洛雯
雖然無綫鍾意力捧港姐，好似陳凱琳、蔡思貝等。不過同樣係港姐出身加星二代嘅湯洛雯就無佢哋咁好彩，拍劇都係做下配角甚至係閒角。不過佢喺啱啱播完嘅《完美叛侶》以Haley一角就獲網民爆Like，話佢自然唔造作，完勝喺《四個女仔三個BAR》入面同樣做律師嘅陳凱琳，更加有不少人跪求TVB捧佢做女一添！

林穎彤
近排憑住熱播劇《城寨英雄》成功彈出嘅林穎彤，喺劇集入面被爛賭老豆賣完又賣，最後仲俾人輪姦致死，簡直慘無人道。佢自爆細個有行乞嘅經歷，更加令佢嘅演技入木三分，被網民激讚！希望佢以後喺唔同嘅角色都可以咁有神髓啦！睇好你呀！

陳瀅
身為宅男女神，觀眾緣肯定有番咁上下，前途本來一片光明。不過可能由於之前要專注同何猷亨嘅「事業」，所以產量唔多。到依家分咗手，唔知會唔會多啲出嚟見觀眾呢？

陳嘉寶
相信各位都一定仲記得陳嘉寶喺《殭》入面飾演何月，令人耳目一新嘅表現，同劇嘅其他女演員sell樣，佢就sell清新，成功獲得唔少網民愛戴。雖然《殭》只係佢嘅第二套劇集，不過演技就出奇地自然，獲得網民激讚。依家已經回復自由身嘅佢不妨可以考慮下無綫啦！

賴慰玲
喺《殭》成功彈出嘅賴慰玲，佢嘅好演技就已經令觀眾印像深刻，做迷信神婆幽靈做到入型入格，佢扮可愛溝仔嗰段就更加冧掂唔少宅男。另外，喺劇集《純熟意外》中飾演冷靜Madam莫曦彤，雖然戲份唔多，但都十分搶鏡。就連黃秋生都公開讚過賴慰玲，話佢係後生版嘅DoDo姐，好有前途。

劉珮玥
身為2013年香港小姐季軍嘅劉佩玥靚女就當然唔駛講，起初入行都係做下主持，去到2015年終於有得接拍電視劇《四個女仔三個Bar》。近排備受力捧嘅劉珮玥經常都會見到佢，早前播完嘅《殭》及《一屋老友記》都有佢蹤影，而依家熱播嘅《城寨英雄》亦有十分重戲份。早喺《四個女仔三個BAR》嘅時候已經獲得唔少讚賞，喺《殭》又被讚演技進步神速。曝光率咁高，但負評少過陳凱琳同蔡思貝咁多，唔怪得知無綫要力捧佢啦！