有種男人 天生喜歡當兵

做兵做兵，世人一聽到做兵呢個行為，一定係覺得負面，而且仲覺得一定係女方有問題，收人做兵。但其實，呢個世界，係有一種男人，天生就鍾意做兵，你畀個將軍佢做，佢會唔慣。

我見過一個男人，佢鍾意做兵嘅程度係會嚇親旁人。首先，佢係明知道自己只係一隻兵，喺人前人後，佢都係咁樣表達自己嘅身份。其次，佢嘅娘娘並非一般平易近人嘅娘娘，通常一個娘娘要收兵，都係要哄下人，發下軍糧，但佢個娘娘係完全唔會咁樣對佢，基本上，佢娘娘只當佢係一個呼之則來揮之則去嘅奴隸，娘娘有咩要買，會Call佢出嚟畀錢，娘娘網上睇岩啲咩，會叫佢入錢，娘娘有咩野需要司機，佢會揸架車出去，同一個奴隸無疑。

而最最最搞笑嘅係，佢娘娘對佢呼呼喝喝，而佢亦對呢種呼喝非常習慣，不以為然，佢娘娘對佢態度之差，人所共之，只係差在未係街上打佢十四巴，佢娘娘本來就無心要收佢做兵，不過係佢心甘情願，一心要去服兵役，而且做得非常滿足，經常將做兵嘅經歷打上Fb，講下自己有幾幸福，幾感恩佢娘娘今日召見佢（所謂召見就係叫佢出嚟畀錢）…

其實大部分做緊兵嘅男人，佢都知道自己做緊兵，咁點解明知做兵都仲要做呢？因為佢地鍾意做兵，你覺得佢做兵好慘好委屈，其實佢做兵做得不知幾開心，你唔係天生有當兵潛質嘅人，你係唔會明白。人人想要嘅野都唔一樣，佢鍾意做又做得開心，又有咩所謂呢？