李丞責拆解改名玄機

東方日報
·1 分鐘文章
想改個好名唔容易,等丞丞師傅指點吓大家啦!
想改個好名唔容易,等丞丞師傅指點吓大家啦!

俗語有云「唔怕生壞命,最怕改壞名」,繽FUN星網節目《玄途有李》由著名堪輿學家李丞責博士與主播嘉琪一齊暢談風水玄學,最新一集會以改名為主題。

丞丞師傅指「名」包括字形、字義、部首、發音、筆畫數、五行、卦理等,改名其實相當複雜困難:「好嘅名有人用咗,你再用就打折扣,名畀人第一印象,會產生一個睇法,如果個名太深奧,人哋讀唔到就發揮唔到作用,名太普通又多人用就唔係自己所有,長輩嘅名又唔可以用。」

另外,改名亦要配合生肖的特質,丞丞師傅舉例說:「屬龍係領導能力高,創造力大,但服從性低,因此改名要加強服從性或規律性呢方面,而龍同狗係相沖,所有同狗字、犬字相關,屬龍嘅人都唔係咁配合。就算同一個生肖,都可以分為四季,春牛係開荒牛,改名時想佢勤力啲,夏天係翻秧嘅牛,將農作物歸一易於收割,喺整理上要求高,所以要改個輕鬆啲嘅名,令佢冇咁執着,秋收嘅牛最易得到財富,改名應該着重人情感情上,冬天嘅牛懶,就要鼓勵佢勤力啲。而牛同羊相沖,羊包括太陽個陽字,屬牛嘅人都唔係咁啱用。」