李佳芯玩「騎乘」激讚何廣沛好腰力

李佳芯昨日穿睡衣出席宣傳活動，她騎住做掌上壓的何廣沛與黃庭鋒，又大讚他們好腰力！面紅耳熱的她笑說：「現實中好少畀仔圍。」

無綫熱播劇《愛美麗狂想曲》演員李佳芯（Ali）、何廣沛、蕭正楠及陳瀅等昨日在將軍澳電視城進行睡衣派對宣傳，Ali騎住何廣沛與黃庭鋒測驗他們的腰力，兩人在她的鞭策下狂做掌上壓，畫面有味又搞笑。Ali大讚他們好腰力兼節奏好，在上面也不會失平衡。何廣沛即怕醜指首次有靚女在公開場合讚腰力好。Ali被兩人弄到面紅耳熱，她笑說：「現實世界少有畀仔圍，惟有喺戲劇世界享受。（甩拖好Dry？）我不嬲都低調，現實中內斂啲，喺鏡頭前就會開放啲。」

劇中與Ali有浪漫場面的何廣沛被問到下次合作可會爭取拍床戲？他即笑說：「講呢啲，做好角色就得。」Ali卻玩爆料：「佢大把啦，拍劇時試過唔同女伴，哈哈！」談到無綫行政總裁李寶安將退休，笑問可有興趣做高層？Ali稱年紀尚輕未夠資歷，何廣沛則說：「大嘅都唔敢諗，做細嘅就更加唔諗啦！」

陳瀅私伙睡衣上陣

陳瀅以私伙睡衣上陣又抱住熊公仔亮相，指公仔最可愛的地方是按壓其腳板會講「I love you」，蕭正楠則搞笑說：「我屋企都有個，人形咁大嘅，撳佢腳板底會同我講I love you。」並透露老婆黃翠如曾撞車，背脊間中會痛，故不時要為她按摩紓緩，他又自誇手勢好。笑問2人可有興趣做高層，陳瀅笑說：「細個想做女強人，有諗過做經理人！」阿蕭取笑說：「你想坐樂小姐個位！」她即連忙否認，場面搞笑。