李雲迪嫖娼︳女伴轉不停 街邊小便 鋼琴王子形象崩壞

內地「鋼琴王子」李雲迪涉嫌嫖娼被北京公安當局行政拘留，藝術家形象可謂蕩然無存。

今年39歲嘅李雲迪喺重慶出生，本名李希，後改作李希熙，5歲時再改名做李雲迪。李7歲開始學琴，11歲參加重慶少年兒童鋼琴比賽奪冠，12歲再贏埋全國賽事。到2000年，18歲嘅李雲迪出戰以高水平而著名嘅蕭邦鋼琴比賽，佢以大熱姿態勝出，成為賽事有史以來最年輕嘅金獎得主，亦係首位中國人獲得呢項殊榮，自此斐聲國際。

當時李雲迪嘅造型近似大熱日劇《悠長假期》中飾演鋼琴教師嘅木村拓哉，令佢成為少數偶像派鋼琴家，亦令佢嘅人氣比另一中國演奏家郎朗更勝一籌。

李雲迪唔止喺古典音樂界發展，近年亦有參與內地電視綜藝節目，去年參加《跨界歌王》，而最近嘅《披荊斬棘的哥哥》都有佢份。但係更受注目嘅係多宗緋聞同負面新聞，喺「緋聞男友」王力宏公開同李靚蕾嘅戀情之後，李雲迪都唔執輸自爆有女友田霏，但係巧合地田霏同李靚蕾都係哥倫比亞大學畢業！

同田霏分手之後，李雲迪多次被拍到同女性密會，前年更被網友爆料，影到李揸車同靚女外出期間，竟然泊架車喺路邊再隨地小便！而今次嫖娼事件後，更有內地媒體指李唔係第一次被斷正，形象一鋪清袋，怕且好難翻身！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！