李龍基73歲做老豆？ 細36年準基嫂發文回應︰無語！

縱橫歌壇及電視圈多年嘅李龍基，同年輕36歲嘅未婚妻Chris（王青霞）表現恩愛，更打算於今年底結婚。早前Chris喺社交平台post出名牌愛馬仕嘅玩具木馬，旋即惹來網民討論，有人話係咪買定玩具俾小朋友……咁咪即係喜上加喜？

Chris隨後再喺IG POST上一張小狗敷面膜好chill嘅相，內文就話「無語！反正腦洞大開的無藥可救」，係咪回應大肚傳聞？而向來「惹火」嘅劉馬車就留言話「有咗bb恭喜，但李龍基做得你爸爸」。Chris就回應謂「根本沒有這回事，造謠者的假新聞害人不淺」。

73歲嘅李龍基同36歲嘅Chris 20年前已經相識，二人拍拖一段時間，外界甚至基哥朋友們都稱Chris做基嫂，但原來二人仍未拉埋天窗。或者因為年齡有差距，Chris曾有唔少負面報導，指佢曾經做小姐，而Chris自稱就讀多間著名大學亦引人注意﹐但基哥都一一代為反駁。

李龍基之前有過一段婚姻，而即使Chris年輕貌美，但基哥仍然十分信任愛人，甚至將名下多個物業轉俾Chris。李龍基話自己注重養生，強調「有心有力」。2020年初，有傳Chris 不幸小產，李龍基未有正面回應，只係多謝傳媒關心。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！