東張西望｜聾啞人士單位被佔據惹關注 林希靈當面質問女保安被網民讚有正義感

無綫資訊節目《東張西望》採訪唔少社會時事及民生等議題，近日就報道關於聾啞人士美華單位被保安娟姐佔據及要喺走廊露宿，節目出街後事件隨即獲得觀眾關注。喺最新一集（16日）中，主持林希靈前往現場採訪，期間忍不住質問娟姐兼話佢冇人性。唔少網民睇完節目都紛紛留言大讚林希靈有正義感，封佢做「正義女神」。

《東張西望》近日報道嘅單位佔據事件，主角美華係一名聾啞人士，多年嚟一直與父親同住該單位，直至2017年父親離世，女保安娟姐憑美華父親嘅遺囑得到呢個單位，更將美華趕出單位，四年來美華都係喺單位出面嘅走廊露宿。而娟姐就話自己有付出所以就有收獲，喺噚晚嗰集娟姐更要美華將個人物品搬走，眼見娟姐步步進逼，林希靈都忍唔住要為美華發聲，即時指娟姐付出同收獲唔成正比，及爆seed話：「咁佢瞓邊呀？咁樣好無人性喎！佢咁多年喺度住，而家已經50幾歲喇喎。你又話你好好人好錫佢嘅？而家即係點呀？」之後，娟姐就大聲話：「你係咪要惹嬲我呀？」及回到屋內，而林希靈只好安慰美華。

唔少網民睇完呢集之後，除咗戥美華唔抵之外，仲紛紛留言大讚林希靈表現，兼封佢做「正義女神」，例如：「多謝你為美華出聲！」、「頭先睇東張西望見到妳好勇，真係大快人心，妳做得好好」、「睇完東張西望嚟呢到！我覺得你超級無得頂！」、「希靈岩岩睇東張西望見到你爆seed鬧個煲湯娟睇到好爽 好勁ah你 希望美華快啲攞翻間屋，煲湯娟遲早有報應」、「女神正義」、「女神頭先爆seed好勁，伸張正義」、「希靈做得好！真心勁揪, 正義女神」、「賞你的善心 散發正能量 繼續把愛傳遞下去」、「謝妳正義女神」及「頭先睇完東張西望，你真係堅到爆！幫美華出聲講到人口啞啞！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！