林作無懼被打死 鍾培生:慢慢羞辱佢

東方日報
·2 分鐘文章
林作(左)與鍾培生互睥當「前哨戰」,但林作一度偷笑。
林作(左)與鍾培生互睥當「前哨戰」,但林作一度偷笑。

麥明詩舊愛林作與「富三代」鍾培生因100萬抽水風波而引發的百萬擂台戰終於打得成,昨日2人舉行記者會公布細節,先打口水戰,火藥味濃!鍾培生多次爆粗鬧林作是屎,霸氣稱10秒便可打低他;而林作則死撐代表普通人對抗權貴,冇諗過輸!

「林鍾大戰」記者會昨午3時在鍾培生淺水灣豪宅的大花園內舉行,花園旁設有一個大擂台,近百傳媒採訪。自抽水事件後2人首度同場,甫開始鍾培生已嬲爆爆,不屑望林作,林作則與媽咪一同向傳媒揮手,表現輕鬆。期間鍾培生多次中英夾雜爆粗,踩林作是屎:「Little piece of shxt變咗big piece of shxt!」

他指賽事有限重規定,若他超越合約規定的重量,林作會直接獲判技術勝出,而且每超重0.5kg便要賠對方1萬元,林作則不受此限。而無論賽果如何,林作都會獲得出賽費100萬元,若他違反合約無法出賽,要賠償期間所有宣傳支出。賽事合共4個回合,每回合2分鐘,同場會有樂隊和歌手演出,猶如體壇娛樂盛事,預計9月舉行,並設有現場觀眾,門票收益將捐作慈善用途。

不排除邀裕美助興

會後主持指2人不會握手,但可以互睥,期間林作忍不住笑。鍾培生自認並非職業拳手,手腳不協調,但霸氣說:「10秒就打低對手,會慢慢折磨羞辱佢,全力打佢個嘴同身體。(話你恰人?)恰佢又點!」林作則力撐:「我代表老百姓,普通人對抗權貴,100萬對我好重要,出賽費用作擴展事業版圖,會認真打,有信心贏,我嘅人生係勵志故事,我人生最大成就係呢次!」

鍾培生自言已簽生死狀,又指媽咪和嫲嫲都怕他打死人:「佢哋幫對手唸經,始終鍾家做好多善事,叫我唔好打死人,會戴個重磅拳套,保護住對手,但唔會就住打,想教訓欺善怕惡嘅人。」又自爆戒飲汽水、少酒少甜品備戰,保證不做肥仔,至於演出藝人方面,不排除邀請林作女友裕美。

而林作被傳會未打先投降,他死撐有6成贏面,但卻加重人壽保險,受益人是女友裕美:「冇立遺囑,冇諗住死,冇諗過輸,我腦海中淨係諗住點幫佢挽回少少顏面。」但又踢爆媽咪與女友都買他輸,投訴女友唔錫佢。

鍾培生全程嬲爆爆,揚言唔會留力。
鍾培生全程嬲爆爆,揚言唔會留力。