林家謙爆紅壓力大 隨時縮返去幕後

林家謙獎座晒冷,並除低口罩展現笑容。
林家謙獎座晒冷,並除低口罩展現笑容。

唱作人林家謙前晚於ViuTV音樂頒獎禮《Chill Club推介榜 年度推介20/21》橫掃6獎成公投大贏家,榮獲歌王及年度之歌殊榮。他騷後受訪時自爆因最近備受矚目而壓力爆煲,爆瘡又肚屙,又承認不排除有「縮沙」可能性:「如果有太多討論我真係會縮返去做幕後,一嚟唔係好慣、二嚟我由初入行到依家都係純粹想唱番自己啲歌,只係畀機會自己試吓。(台上攞獎木無表情,關肚屙事?)我唱歌不嬲木獨。」隨即除低口罩展現笑容,並笑說:「其實我笑緊(口架)!我唔識用眼笑。」

至於賽前被預測為奪金大熱人選的許廷鏗,最終只攞到歌曲獎,但他直言冇失望,對於有指他為攞歌王而向ViuTV表忠,不惜推掉無綫選秀節目《聲夢傳奇》導師一職,他無奈笑說:「呢個年頭邊會仲有換獎?係有搵過我,但當時同前唱片公司仲有合約問題未解決先做唔到。」另外,再傳他會重返星夢,目前是自由身的他聞言大笑兼否認:「邊度聽嚟(口架)?咁就繼續傳啦!」而歌后林二汶希望可自薦做音樂電視劇導演,為電視界帶來新衝擊。