林欣彤《巨聲》出身被指「小巨肺」因失聲越做越霉 網民力數「點解唔紅」原因

·4 分鐘文章
林欣彤
林欣彤

TVB歌唱選秀節目《聲夢傳奇》15位學員完成比賽後,憑歌藝吸納一班粉絲,當中以炎明熹(Gigi)、姚焯菲(Chantel)以及鍾柔美(Yumi)最俱人氣,網民提議佢哋組團出道。有人聯想到《聲夢傳奇》導師之一林欣彤(Mag)亦喺2010年憑歌唱選秀節目《超級巨聲2》贏得冠軍,由學生變成一夜爆紅嘅追捧對象;不過,林欣彤嘅星途就無想像中咁順利,網民最近亦喺討論區以「林欣彤點解唔紅?」為題,討論林欣彤點解好似停滯不前,上唔到一線。

林欣彤喺《超級巨聲2》有過唔少令人印象深刻嘅參賽歌,就好似翻唱 G.E.M.《A.I.N.Y.》以及台灣歌手A-Lin《愛請問怎麼走》,不但畀原唱大讚,網民更加貫以「小巨肺」之稱。翌年林欣彤簽約英皇娛樂,首張個人唱片《Vocalist》獲得白金銷量並橫掃四大頒獎禮新人獎項,不過之後因情緒問題而失聲,甚至要停工休養,都令佢星途浮浮沉沉。

有網民就喺討論區直指,林欣彤喺入行頭幾年進步大,但呢幾年表現好唔穩定,除咗因為停工嗰段時間影響到人氣,其實好多壞習慣都依然存在,以下就係網民對林欣彤「點解唔紅?」嘅評價。

氣聲問題仍存在
網民認為林欣彤唱歌除咗似「鼻塞」之外,多年嚟氣聲都未有改善,有時候用氣聲表達感情係好事,但總唔能夠每唱一句都有氣聲,仲話到:「呢個應該係職業歌手本身要知既野吧?」、「佢d氣音聽得好辛苦」、「如果呢個係佢賣點就只怪我唔識欣賞」、等等。

台風不足
有網民就認為林欣彤因為身形矮小而感覺壓唔住舞台,尤其係拍住其他歌手同台演出嗰陣氣勢完全比下去;加上林欣彤好中意揸咪嗰時係咁郁,搞到出嚟嘅聲時大時細,好唔穩定,令人聽得好辛苦咁話。

欠缺清晰定位
都有唔少網民認同林欣彤有唱功,但就差在唱片公司無幫佢做到一個好清晰嘅曲風定位,感覺好似每個曲風都嘗試;不過近年推出歌曲《忍》、《不如憎你》就似乎見返啲方向係向虐心自勉情歌發展。

個人形象太霉
林欣彤除咗不時有情緒問題,網民感覺佢形象都好霉,時時都會受傷生病,就好似早前又因為帶愛犬「飛飛」落街而仆落樓梯,整傷手腳及牙鉸韌帶,膝頭哥亦骨裂,至今仍未完全好返,網民就認為:「俾人感覺都好霉」、「越做越霉」等等。

揀錯唱片公司
有網民指,做藝人要紅唔係完全講實力,都要靠唱片公司幫手。林欣彤2011年加入英皇,不過網民就覺得英皇唔夠力谷林欣彤,就連《Little Something》、《一千零一次人生》等人氣歌曲都無做太大宣傳;2016年轉簽王祖藍工作室做經理人公司,除咗有份演出劇集《老表,畢業喇!》第二女主角同唱劇集主題曲之外,好似都無咩發圍機會,本身訂好期嘅個人演唱會亦因再度失聲被迫取消。而網民就對林欣彤宜家簽嘅華納唱片表示,因為太多女歌手,未可以將資源集中放喺佢身上,始終都唔會被受力捧。

林欣彤
林欣彤
林欣彤
林欣彤
林欣彤
林欣彤
林欣彤
林欣彤

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能