林欣彤情史︳唔係第一次疑似做第三者 曾下跪求出軌前男友回心轉意

早前MIRROR成員AK(Anson Kong江㷸生）拍MV廣邀圈中歌手好友參演，點知有工作人員確診新冠肺炎，導致出現「樂壇傳播鍊」，C Allstar成員On仔、ONE PROMISE鼓手Anton等有份參與嘅都中招。亦因為咁，本身有女友嘅Anton被踢爆將病毒傳染被新歡林欣彤(Mag)，由疫情爆發變成戀情揭發，而Anton亦承認正在同Mag發展，又話係同前任分開先至再有新戀情。

入行11年嘅Mag，受訪時自認戀愛大過天。因為參加《超級巨聲》而嶄露頭角，初出道走勢強勁，但係多年來Mag因為緋聞同情緒病而窒礙發展，今次又再爆出小三疑雲，恐怕又會影響事業。

參加《巨聲》收割羅孝勇

林欣彤同羅孝勇(Sheldon)係同屆《巨聲》參加者，一齊殺入5強，因此傳出緋聞，但係當事人一概否認，直到後來各自有新戀情先至承認曾經拍拖3年。林欣彤曾經提過，喺最受情緒病困擾嗰陣，失眠夜會睇卡通片，當時男友會起身陪佢，甚至食住早餐一齊睇，有傳呢個就係Sheldon。後來羅孝勇同上年主演《梅艷芳》嘅模特兒王丹妮拍拖，對王丹妮同前男友所生嘅女視為己出，羅孝勇同王丹妮最終亦拉埋天窗。

翻撻初戀男友被動粗對待

Mag同羅孝勇分開後，曾經翻撻分手多時嘅初戀男友Ben，但係有傳Mag被Ben暴力對待，甚至試過眼角受傷，出活動要戴黑超遮住。而Mag喺ViuTV節目《吃掉前男友》講起，曾經同前度講電話時對方突然承認有外遇，雙方都講到喊晒，但係Mag當時竟然認為對錯都唔及男友重要，第二朝去到對方樓下，喺屋邨平台向男友下跪挽留。男友竟然淡然一句「我約咗人」就行咗去，照情境睇，當事人似係初戀男友喎。

補習天王疑似偷食

林欣彤2016年時曾被傳媒影到同補習天王David行街拍拖，但David亦隨即被爆同過AGA及前港姐張舒雅拍拖。Mag上電台提到，有舊愛一腳踏兩船，令自己冇端端做咗第三者，關係維持兩三個月左右之後，Mag決定退出。有傳媒估計呢位舊愛係David，但係向Mag求證嘅時候佢話唔記得呢段關係幾時發生。

天堂鳥Tyrese戀有米KOL

被稱為MK POP天團嘅天堂鳥，成員之一Tyrese歐喬鋒有傳喺2018年同林欣彤拍拖，但係後來有報導話Tyrese背住正印Mag暗溝有米KOL Pumpkin Jenn，甚至一齊去日本旅行，Mag可以話係間接被分手。不過Tyrese受訪時否認同過Mag一齊，仲話同舊愛前華姐余思霆分手後，就同咗Pumpkin Jenn一齊。而家Tyrese同Pumpkin Jenn仲訂咗婚，打算疫情過後再行婚禮。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！