林盛斌9歲三女鋼琴竪琴公開賽獲雙料冠軍

作為圈中嘅多仔公，林盛斌（Bob）與老婆黃乙頤（Pearl）喺07年結婚，婚後誕下三女一子（16歲大女林霏兒、12歲二女林熹兒、9歲三女林機兒及6歲孻仔林道申），一家之主嘅Bob密密搵錢養家，令一家六口生活美滿。近日Pearl喺社交網站分享三女機兒獲奬喜悅，機兒喺鋼琴及竪琴公開賽獲雙料冠軍，真係好叻女呀！

Pearl喺社交網站上載機兒喺彈鋼琴及手執100歐元獎金嘅照片，並留言話：「呢個小女孩未夠10歲，一年內俾阿媽迫佢比賽，表演，比賽，表演。無限輪迴，今次參加兩種樂器（鋼琴及竪琴），人哋練一個鐘佢要double，佢冇俾阿媽逼死而且完成了，有料！同場加映，佢仲攞到冠軍！原來有獎金，仲有料！」唔少網民得知機兒獲獎後，紛紛留言恭喜並大讚佢叻女。

而Pearl喺接受傳媒訪問時就話今次機兒係喺比利時參賽獲奬，鋼琴及豎琴都同時獲冠軍，豎琴比賽嘅片段仲將會喺紐約Times Square公開播放。Pearl表示喺機兒係四個仔女中，需要較長時間去適應新事物，咁樣唔代表佢比較蠢或能力特別差，只係佢慢熱及實際。Pearl表示今次出去比賽嘅目的唔係獎項，最重要係培養佢哋廣闊世界觀，正確價值觀及對未來規劃重要性，所以獎項只係額外獎勵。

另外，Pearl仲與傳媒分享最近機兒勝出CTW國際青少年兒童繪畫書法比賽，呢個比賽有數千人參加，而參賽者係來自世界不同地方及橫跨多個年齡層，而最終只有150位參賽者嘅作品能公開展出。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！