【柳俊江以外】歷年男主播花邊新聞 有婚外情有多角戀 爭啲搞出人命

前無線主播柳俊江涉嫌喺一間餐廳同人打鬥而被捕，有報導話柳俊江同太太雷康怡 (Florence) 正在辦理離婚，而當日雷康怡同男友人喺餐廳，柳俊江之後闖入發生爭執。事後柳俊江喺facebook專頁回應，事件源於一場誤會，並為自己的行為致歉，又強調雷康怡係好太太、好媽媽，一切問題出於自己誤解以及毫無理據嘅衝動。

唔少主播晚晚同觀眾見面，簡直係另類明星，部份都同藝人一樣發生過花邊新聞，甚至爭啲搞出人命！

吳璟儁

曾經係無線晚間新聞主播嘅吳璟儁，2015年被傳媒爆同同屬主播嘅藍可盈過從甚密，而吳璟儁當時已經同無線新聞部前記者鄭悅朗結婚3年。消息傳出後，吳璟儁當晚立即被調離主播台，不過半年後，吳璟儁同藍可盈又被安排一齊報新聞。2017年9月吳璟儁離開TVB，轉任政制及內地事務局局長政治助理。而藍可盈前年去英國進修，最近返港加盟Now新聞台。

許方輝

許方輝係資深TVB主播，太太係亞視前主播陳佩琳，2013年有周刊影到許方輝同比佢後生18年嘅TVB新聞之花周嘉儀搭上。事後二人當然被迫暫時離開幕前，陳佩琳亦都搬離寓所冷靜一下。更爆嘅係緋聞見光之後一年幾，有傳周嘉儀仍未死心，向許方輝同陳佩琳作出電話滋擾。最近許方輝正式向TVB辭職，據知係空降有線新聞部出任高層。至於周嘉儀一早離開新聞界轉投金融界發展。

劉家傑

八九十年代以主持《英語一分鐘》節目為人熟悉嘅劉家傑，原來都曾經係無線新聞主播，並主持節目《蒙太奇》。正正因為呢個節目，已婚嘅劉家傑同節目拍檔狄娜擦出火花，點知節目監製李志中亦對狄娜心動，搞出三角關係。後來李志中吞下大量安眠藥自殺獲救，而劉家傑就向狄娜公開表白，更聲言會離婚，但係狄娜最終都無同李劉二人發展過。

李潤庭

未做娛樂主播之前，李潤庭曾經喺加拿大同香港做過新聞主播，本身形象正氣，但係李潤庭2016年被踢爆趁空姐老婆出埠期間，偷食已婚女子Tiffany，立即被TVB雪藏一年。但係復工無耐嘅李潤庭再次被揭發同Tiffany喺劏房幽會。即使係余詠珊愛將都冇情講，TVB決定怒炒，李潤庭一度返加拿大避風頭。