梁祖堯拉MIRROR FB直播解釋趕fans事件 姜濤食足全程

最近梁祖堯同MIRROR拍新節目《調教你MIRROR》，安排成員參加宿營朝夕相對，從而磨合出默契兼建立感情。不過因為拍攝期間fans聚集現場影響進度，令MIRROR成員要出聲，姜濤更被指鬧fans，要事後喺歌迷Telegram群組道歉。

尋晚阿祖就同MIRROR全體做fb live，一來解釋事件，二來可以藉此宣傳新節目。直播期間一班人食住雞煲講拍《調》嘅花絮。捲入「鬧fans事件」嘅梁祖堯強調MIRROR知道Fans有幾愛佢地，但係 Fans喺拍攝場地出現會做成危險又或者阻礙拍攝，而且Fans、經理人出現會令MIRROR成員「做唔到真正嘅自己」。而Edan亦解釋有Fans追隨好開心，但係進度真係有影響，所以12個人一齊決定要同fans講清楚，唔係事先設計好嘅節目效果。

由於《調教你MIRROR》節目未出街，各人都唔能夠「劇透」太多，但係言談間得知部份情節，例如各個成員去到梅窩集合先知冇梳頭化妝人員，姜濤完全冇化妝就出鏡；而年紀最細但本身唔熟嘅Tiger（邱傲然）同姜濤就要每日同對方講50句說話。而向來「天然呆」嘅Ian更被爆喊得好犀利。

現時節目拍攝進行咗一半，不過成員已經感情大增，仲話過程觸及好多內心題目，唔一定可以出到街。Anson Lo（盧瀚霆）講起呢個camp令佢了解到細個嘅經歷可以影響而家點待人處事，Anson Kong（江𤒹生）就話解決到團隊好多問題，Jeremy（李駿傑）甚至話經過一晚詳談之後，MIRROR先至正式組成。梁祖堯就話今次各個成員心底裡都係愛隊友。

不過最搶鏡嘅依然係姜濤，因為佢食足全程，完全冇停過，把口自然唔得閒，所以只係講咗幾句，就連隊友Anson Kong要佢調位唔俾食嘢，姜濤都講明唔走！後來姜濤都有回應今次事件，話自己掙扎咗好耐先開口，但係表明唔會將fans用來開玩笑。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！