楊千嬅演唱會門票滯銷 保良局副主席認自資買飛轉派學校：適合年青人睇

楊千嬅一連兩場《MIRIAM YEUNG B minor MUSIC LIVE 2022》演唱會將於周六（17日）及周日（18日）喺亞洲博覽館舉行，而今次嘅演唱會門票滯銷一事成為網民嘅焦點。早前網上流傳演唱會因入座率不足而取消演唱會，不過好彩得到楊千嬅老公丁子高出面澄清。日前網絡流傳一張保良局荷蒙李何芷韻副主席轉贈楊千嬅演唱會門票予學生嘅圖片，結果引起網民熱烈討論，有傳媒向李太查詢，而佢亦大方回應係佢自資買飛轉派俾學校。

日前網絡流傳一張保良局荷蒙李何芷韻副主席轉贈楊千嬅演唱會門票予學生嘅圖片，指每間學校經申請後可以獲得10張楊千嬅嘅演唱會飛。李太接受傳媒查詢時承認自資買飛轉派俾學校俾佢哋睇，佢經常都會透過唔同嘅主辦方買飛，邀請不同人士欣賞不同嘅文藝活動表演。佢有請學生、長者或有特別需要人士參加，只係傳媒冇留意及報導。而佢今次就買咗200張楊千嬅演唱會門票，因為見到楊千嬅喺電視上與新生代歌手互動，再加上知道佢開演唱會，覺得適合年青人睇。而佢個人亦好鍾意楊千嬅，認為佢係廣東歌嘅重要代表，有很多好歌。

唔少網民抱住食花生嘅態度去睇今次嘅派飛事件，例如「轉贈學校小朋友點會有興趣 轉比老人院公公婆婆睇好過啦」、「老師都唔會要 就算50歲情願睇新疆棉」、「送都冇人要」、「免費都唔想睇」、「我係驚唔洗抽籤 一報名就即有兩張」、「未聽過學校會請學生睇演唱會 記憶中學校都應該唔太鼓勵學生崇拜偶像」及「啲學生識佢咩」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！