楊思琦向李居明直認有好多男朋友 網民：佢太刻意晒幸福

楊思琦喺2020年承認自己已同圈外人喺美國註冊結婚，一直以嚟接受唔同訪問佢都自認現階段幸福滿滿，不過就從無公開過老公身份，令唔少網民都指佢嘅另一半係「虛擬老公」。日前，楊思琦就無啦啦直言話自己有好多男朋友，令到感情狀況更加撲朔迷離。

楊思琦同玄學大師李居明一齊拍攝粵劇一百周年電影《粵劇靈》嗰陣，師傅嘅建議同楊思琦嘅回答都搲爆頭。師傅指牛年流行姐弟戀，而楊思琦會係牛年旺桃花，鼓勵佢勇敢面對，而楊思琦就回答：「身邊確實有不少男朋友，只是大部份較我細十年八載，所以不能接受姐弟戀。」令唔少網民都留言叫佢唔好再講大話：「其實做單親無問題」、「佢太刻意晒幸福」等等。

仲有網民繼續爆料，指自己住楊思琦屋企附近，成日都見到佢自己一個人：「成日見到佢係自己一個，再唔係就得佢阿媽陪。」，有網民亦提到如果一齊住，狗仔隊無可能發現唔到。加上，一直都無見到老公係社交平台出現過，有時訪問被問到老公，楊思琦都唔願意多提又或者答啲模稜兩可嘅答案耍走記者，就好似之前撞車被問到受傷期間老公點照顧佢，楊思琦態度就好避忌，表示呢個問題好難答，種種一切令網民更加質疑楊思琦老公到底係咪存在。

不過，楊思琦懶理網民嘅質疑，依舊喺唔同訪問將老公掛喺口邊，就好似近日到新城接受薛家燕訪問，佢亦提到老公喺母親節當日山長水遠買朱古力蛋糕送畀佢，就算自己唔嗜甜都覺得好啱食。對於老公身份成謎呢點，佢就曾經接受訪問講過，無為幾時公開另一半諗過期限，所有嘢都想順其自然：「老公比較怕醜，很難想像不是這一行的人，會有幾憂慮、驚和擔心，總之我會尊重他的意見。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！