樂隊Pandora回應粉絲迷思「點解咁耐冇真人MV？」 Pan仔：一拍真人MV就要老咗睇返都微笑

三人男子樂隊Pandora（Pan仔），由主音吉他Tony、低音吉他Anakin（阿勤）同鼓手Michael （細佬）組成！上年樂隊以《安全距離》首獲兩台冠軍（903專業推介加Chill Club推介榜）及於年尾舉辦嘅專場《GALAXY WITHIN》以極速售罄門票後，狀態越戰越勇嘅三子今年以《緊急應變逃生法》《反引力塵》打開第四張專輯概念之門！期間樂迷都有個迷思：「點解Pandora由《風月》開始都偏向以動畫製作MV？點解唔拍真人MV？」Pan仔笑稱：「因動畫嘅MV，流量比起真人更好！」當然粉絲（稱為盒仔）唔接受Pan仔嘅說法；於是長期敲碗真人MV！

卒之嚟到第三首派台作品《粉紅泡泡防護罩》，佢哋有感歌曲輕鬆快樂嘅風格同時都想趁年輕有活力時盡情展現俾觀眾睇，先會鐵定真人拍攝！歌曲主題係當我哋遇上適合嘅人，每刻腦袋嘅思路都充斥住粉紅色，就似濾鏡罩住自己眼球一樣，無論做咩都滿佈粉紅泡泡，猶如甜到漏嘅人生！所以MV故事係講三人於Café工作，有一日收工就覺得要任性下，喺舖頭做人生最喜愛嘅事 - 夾Band！從而感受最極致嘅快樂，亦帶出唔同嘅事情都能讓生活甜蜜令人生美滿。

基於由細到大嘅關係建立，三子私底下嘅bromance非常濃厚經常讓人衍生滿滿幻想或懷疑（除咗親兄弟嘅Tony與Michael能夠避嫌）Pan仔：「今次MV嘅畫面構造，好有趣亦產生唔同嘅視覺、濾鏡，讓觀眾可以幻想唔同嘅意境，甚至聽到歌曲時幻想喺粉紅泡泡下飄浮同甜笑嘅滿足。

不過我哋睇《粉紅泡泡防護罩》MV反而覺得好感動，因為會諗三個老咗，感情仍然好好，會約埋「諗返舊時」會好歡樂嘅畫面，能有滿滿嘅回憶殺湧出嚟狀態。」