「民間電視大獎」出爐 ViuTV揮低TVB囊括多個大獎

嚟到頒獎禮嘅季節，大家最關心嘅就係各大獎項花落誰家。無綫舉辦嘅《萬千星輝頒獎典禮2019》喺1月12日圓滿落幕，雖然「最佳男主角」、「最佳女主角」及「最佳劇集」等7個獎項由觀眾及無綫評委會投票選出，唔知大家又滿唔滿意今屆嘅賽果呢？如果唔滿意嘅話，不如睇下由百分百由市民喺網上提名及投票，社交網站專頁「方以文 睇電視喇喂」舉辦嘅「觀眾在民間電視大獎」啦！

「觀眾在民間電視大獎」已經嚟到第四屆，今屆一共有16個獎項，得獎名單如下：

民選最佳劇集：《教束》（ViuTV）
民選最佳劇本：《教束》（ViuTV）
民選最佳男主角：劉俊謙《教束》飾演盧文達（ViuTV）
民選最佳女主角：李施嬅《金宵大廈》飾演楊玉華Coco ／章瑋Alex（無綫）
民選最佳男配角：周漢寧《教束》莊子民（ViuTV）
民選最佳女配角：鄧麗英《教束》郭可儀（ViuTV）
民選飛躍進步男藝員：姜濤
民選飛躍進步女藝員：麥可怡
民選最佳時事資訊節目：《頭條新聞》（RTHK）
民選最佳綜藝節目：《Good Night Show Mirror Go》 & 《Mirror Go》（ViuTV）
民選最佳女配音員：梁少霞《多啦A夢》源靜香（無綫）
民選最佳男配音員：文卓森《全民造星II》旁白（ViuTV）
民選最佳主持：MIRROR《Good Night Show Mirror Go》 & 《Mirror Go》（ViuTV）
民選最佳戲劇拍檔：姜濤＆陳卓賢《戀愛要在生日前》姜＆Ian（ViuTV）
民選最佳戲劇橋段：龔水白色情人節告白《愛·回家之開心速遞》（無綫）
民選最佳電視歌曲：ASAP（ViuTV）

喺今屆ViuTV囊括多個大獎，成功揮低無綫，成為大贏家，當中劇集《教束》更勇奪5個獎項，包括「民選最佳劇集」、「民選最佳劇本」、「民選最佳男主角」、「民選最佳男配角」及「民選最佳女配角」，認真犀利呀！另外，雖然李施嬅喺《萬千星輝頒獎典禮2019》大熱倒灶，未能榮升視后，不過佢就能夠憑《金宵大廈》成為民選視后。