法證先鋒6｜日籍型男和泉素行流利廣東話演出惹關注 原來一早亮相過TVB？

TVB劇集《法證先鋒VI：倖存者的救贖》正熱播，被指集結唔少新生代小花，例如郭珮文、郭千瑜、邢慧敏等等，網民留意到日籍型男演員SOKO和泉素行亦有份演出，KOL健吾亦於社交平台轉發有關和泉素行出演嘅媒體報道，寫道：「終於都入到tvb」，但原來和泉素行一早亮相過TVB？

和泉素行於修讀日本大學期間開始學國語，然後去廣州讀書，覺得廣東話比國語更困難，因此決定向更高難度挑戰，更於2007年定居香港，當時已講得一口流利廣東話。和泉素行做過酒吧、模特兒及教日文等工作，但始終想做藝人，之後機緣巧合下加入電視台做主持慢慢喺娛樂圈發展，演藝背景相當豐富，除咗曾為多個電視台擔任節目主持及現場活動擔任司儀，更集YouTuber及演員身分。和泉素行工作機會相當多，經常拍攝搞笑影片及飲食情報於個人YouTube頻道，亦遊走於唔同電視台，2020年曾與小儀為香港開電視節目《酒勻全香港》擔任主持，其後又再拍住小儀主持商業電台節目《咪芝巨星》嘆盡食店及飽覽食店內沿途小故事。另外，和泉素行曾出演ViuTV劇集《太平紋身店》、《繩角》、《殺手廢J》，又曾憑日本電影《二人小町》榮獲提名《第25屆米蘭國際電影節》「最佳男主角」殊榮。

和泉素行於《法證先鋒VI：倖存者的救贖》第十集尾段出亮相，飾演刑警服部「研一郎」一角，KOL健吾於社交平台表示：「終於都入到tvb。」但其實和泉素行早於2018年已亮相TVB，於劇集《冒險王衛斯理之無名髮》第1、2、3、6及8集皆有戲份，當時已被觀眾大讚廣東話，表示廣東話對於外地人嚟講係好難學，難得和泉素行可以講到咁流利。此外，和泉素行亦有份於劇集《救妻同學會》飾演劉佩玥哥哥。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！