洪永城家暴疑雲 驚動鄰居撳鐘仔

東方日報
·3 分鐘文章
洪永城自爆在家中練配音嚇親鄰居!
洪永城自爆在家中練配音嚇親鄰居!

藝人洪永城因參加無綫配音比賽而惹上家暴同居女友疑雲,遭鄰居撳鐘,慌張問道是否需要報警,令他哭笑不得!而林夏薇則大呻因經常被催生,搞到壓力大,最後一次重申暫時未有生B打算,兩公婆要放慢腳步!

無綫新節目《好聲好戲》昨日錄影,主持人阮兆祥及賴慰玲,汪明荃、韓馬利及陳永信則擔任主席評判,而嘉賓有洪永城、林夏薇(薇薇)、陳自瑤、郭子豪、楊潮凱及羅毓儀。洪永城受訪時自爆因每日都在家中練配音,練到鄰居以為他家暴女友,撳鐘關心是否需要報警:「因為我要扮『丁蟹』好聲嘶力竭咁瘋癲講嘢,就算喺屋企閂窗閂門都冇用,啲聲連鄰居都聽到,以為我打女友,撳鐘一開門就好驚慌咁問『冇事呀嘛?』、『使唔使報警?』,但練聲係要用真實聲,就住就住係練唔到,差啲練到好似『丁蟹』咁掟幾個人落街!」

雖然練習過程辛苦又困難,但他表示是個好的嘗試,做過配音工作才知配音員難做,自問冇這方面的天分,但好想接受挑戰配不同角色:「好似羅嘉良喺《難兄難弟》入面李奇把聲,壓聲演出都有難度。」問到有否被評判挑剔?他說會尊重評判的意見,希望更加進步。講到他為主演新劇《凶宅清潔師》擔任編劇,他坦言是個重大挑戰,感謝公司放手讓他與監製盧思麟及C君一齊學習、合作,暫時只是初步階段。

林夏薇唔急生B

同場擔任打氣評判團的薇薇,笑指當想參賽時已名額爆滿,今次當是抱學習心態前來向前輩偷師:「之前都配過動畫入面嘅男仔小朋友,同埋有時拍劇都要配番自己音,已經好難。(想挑戰配咩角色?)或者係女仔小朋友,自己唔係專業,揀番啲同自己聲線比較接近嘅角色好啲。」她亦對配韓劇有興趣,特別是壞女人角色,因奸角有發揮空間。她表示現今仍未見過堂兄林峯的女兒真人,時間長到就連B女幾大都忘記,希望盡快通關:「有視像嘅,最怕買畀佢啲衫仔唔啱Size。(唔啱就留番畀你自己嗰個?)個款會過時喎!」幾時進行生B大計?她笑說一直以來只有傳媒替她着急,自己、父母、朋友從來冇急過,愈問只會愈大壓力,又坦言:「生B陪伴係好緊要,暫時都未有呢個時間,放慢腳步先。」

林夏薇有興趣為韓劇配音,聲演壞女人角色。
林夏薇有興趣為韓劇配音,聲演壞女人角色。