【浪卡襲港】重溫記者颱風直播經典畫面 竟然用呢樣食物測風速！

10月仲有機會打風！南海一個熱帶低氣壓正在靠緊華南沿岸，天文台預計會掛3號風球，打工仔就梗係好緊張會唔會上8啦。一到打風，你有得休息，但係記者就仲要出去採訪，電視台記者遇著大風大雨，吹到面容扭曲都仲要做直播，雖然畫面有時幾好笑，不過真係值得敬重。希望你地平安收工啦！

潘蔚林紮馬「追風」最犀利

2009年7月，無綫記者潘蔚林喺尖沙咀天星碼頭海傍報道颱風「莫拉菲」襲港，風勢勁到將潘蔚林嘅頭盔同鞋吹走﹐連佢都爭啲被風吹跌，甚至直播期間吹到成個人45度向前傾斜！呢個姿勢同Michael Jackson嘅經典舞姿太相似，有傳媒稱潘蔚林做「MJ潘」同「颱風之子」。

張家灝10號風球下採訪 爭啲俾浪沖走

好多時打風都非常「食風」嘅柴灣杏花邨，一定係新聞颱風直播熱點。2018年令天文台掛起10號風球嘅「山竹」吹襲，TVB派出記者張家灝去到杏花邨採訪，做「扒」（對住鏡頭講述現場）期間一個浪打埋嚟，成個人企唔穩，好在冇跌低。經此一役，觀眾都話「潘蔚林有接班人」！

女記者出征杏花村 觀眾同情汪溟曦

2012年7月，颱風「韋森」特襲港期間，TVB女記者汪溟曦喺9號風球生效嗰晚，被派去杏花邨呢個打風聖地做現場報道。雖則汪溟曦冇去到岸邊咁出，但一樣吹到「甩頭甩髻」，網友睇見都戥佢辛苦，仲問「成個TVB啲男記者去晒邊？」。

台灣記者帶道具測風速 用呢樣！

打風新聞離不開影風勢雨勢同埋民眾反應，點先可以脫穎而出？台灣三立新聞喺2013年颱風「蘇力」吹襲時，搵記者喺高架橋上測風速，唔係用儀器！而係拎住彩帶、軟尺甚至油炸鬼呢啲道具！由於方式太誇張而且唔科學，觀眾狠插電視台，但係台方就話「以創意方式呈現」。嗯...個講法都幾冇創意。

內地記者超pro報導 吹到大叫「整個人崩潰了」

2006年颱風「桑美」喺福建福鼎市登陸，風力達到17級，當地電視台記者做直播時情況比潘蔚林所遇嘅更惡劣，要拉住棵樹否則成個人吹走咁款。而記者嘅報導方式亦相當有現場感，對住鏡頭近乎咆哮式講述風勢，仲大叫「整個人都快崩潰了」。呢個畫面後來成為網路經典惡搞素材。

美國記者扮受強風衝擊 路人亂入穿煲？

好多時記者做風暴消息直播，都被強風搞到好狼狽，但係都有例外！2018年颶風佛羅倫斯吹襲美國，當地電視台派記者到受吹襲嘅北卡羅萊納州做直播，畫面見到男記者要使出「潘蔚林式」站姿，似乎風勢好勁，點知過一陣畫面後方有2個途人施施然行過……究竟係記者演技好，定係2位路人功力深厚腳步夠穩？