雅虎香港新聞 深水埗新開簡約風x玩味Cafe 推介芫茜大蝦意粉+薄脆拿破崙
又多一間新Cafe開喺深水埗，以簡約為概念同時又有驚喜位，例如餐廳裝修分開兩邊唔同色調，自家製甜品以經典為藍本再加入新元素。如果你係芫茜黨黨員嘅話，就一定要試芫茜苗香辣大蝦扁意粉，意粉面鋪滿幼嫩嘅芫茜苗，味道清香得嚟同意粉又夾！
Minimal位於深水埗鴨寮街，顧名思義Cafe以簡約風為主，同時又融入玩味元素，好似中文名就叫「迷你毛」，Logo嘅「l」就係羽毛圖案。舖頭一邊以淺木同白色為主，感覺自然簡約，另一邊就有幅粉紅牆，頓時充滿少女心呀喂。空間感夠大，門口仲有張圓形梳化畀大家打卡。
炸雞煎蛋窩夫（$95）
鹹嘅炸雞同甜嘅窩夫係常見嘅配搭，勝在廚師喺細節位落足心機，炸雞揀啖啖肉又多汁嘅雞上髀，先用香料同水果醃過夜，再加上自家調配、加入煙燻辣椒粉嘅炸粉，炸至皮脆肉嫩，再加上即製窩夫、燶邊煎蛋、香脆煙肉，最後淋上糖漿，味道同口感層次都好豐富。
芫茜苗香辣大蝦扁意粉（$102）
以最近嘅話題食材芫茜為主，選用美國嘅芫茜苗，既保留到芫茜嘅清香，口感又會比一般嘅芫茜幼嫩得多！醬汁就加入蝦油，再以60度魚露提鮮，無論係聞起嚟定食落都充滿濃郁蝦香。每條意粉都好均勻咁裹上醬汁，而芫茜苗就正正可以平衡返醬汁嘅油膩感，加埋彈牙嘅蝦肉配搭啱啱好。
意大利芝士蛋糕（$72）
經典Tiramisu嘅變奏版，上層係Mascarpone芝士加上咖啡Crumble同朱古力薄脆，下面嘅手指餅就用咖啡酒同杏仁酒浸過，食落先品嘗到芝士嘅空氣感同厚滑嘅口感，之後係朱古力嘅甜味，後勁就以濃郁嘅咖啡同酒香為主。層次豐富。灑上嘅朱古力粉當中其實有混合谷古粉，令蛋糕食落唔會過甜，而且仲加咗少少金粉，帶少少Blink Blink效果打卡一流呀。
薄脆拿破崙（$65）
自家製薄脆用機器壓成波浪形，食起嚟口感亦真係好似薯片咁又薄又脆，而且比酥皮更易切開！四層薄脆夾住原味吉士、榛子吉士同堅果醬，當中以榛子香最突出，加埋Crumble同榛子粒一齊食，味道香甜。配搭雲呢拿軟雪糕，驚喜位係表面灑上爆炸糖，口感更刺激！
Baileys Latte（$44/熱、$48/凍）
餐廳特別請本地Roaster調配House Blend咖啡，風味偏Nutty香，深焙豆甘味亦比較突出。呢杯Baileys Latte入口就先有Baileys奶酒香，後韻就以咖啡味道為主，兩者味道平衡。
檸檬青檸苦酒（$48）
以青檸、檸檬、梳打、苦酒（Bitter）等調配而成，苦酒除咗可以令飲品有漸層效果，仲可以增添草本香氣。有啲似完全無澀味嘅檸檬茶，味道微酸，加上氣泡口感，感覺清爽。
Minimal
地址：深水埗鴨寮街121-123號地舖
