港人經常醜出國際 現今日本人眼中的香港人係點樣？

日本福袋出名好抵買，雖然購買前唔會知道有咩，但通常大家都覺得物超所值。話說今年有兩個香港女生去日本福岡買福袋，但在未付款情況下，拆開多個福袋並重新組合福袋物品。同場有另一位香港旅客拍下惡行上載社交網站，有網民批評兩名女生行為「影衰香港人」。近年發生不同無禮事件影響日本人對香港人印象，究竟日本人對香港人嘅印象係點？

著到成身名牌

唔少日本人覺得香港人比以前更注重打扮。日本街頭上，許多香港人都身穿名牌，總之由頭到尾都係潮牌，好似Bathing ape、Supreme、UNDERGROUND，手戴Rolex，其實一睇就知係香港人。

好鐘意買嘢

成行成市藥妝店裡面，除咗大陸人，當中一定有香港人。近年都亦多咗好多香港人拖篋購物，左一袋右一袋做代購。即使唔係代購，普通香港旅客都買好多，完全唔可以低估香港旅客購物力。

有錢

日本人大多都覺得香港人有錢，除咗好鐘意買嘢之外，日本人亦透過新聞知道香港樓價貴絕全球，閒時香港人又經常去旅行，所以日本人會覺得香港人好有錢。

講嘢好大聲

日本人喺地鐵係絕對唔會高談闊論，通常只會專注自己手機，或者聽歌，連睇報紙都因為怕阻到隔離。相反香港人習慣喺地鐵同朋友傾談，所以日本人會覺得香港人講嘢好大聲，加上廣東話獨有語氣，日本人成日以為香港人喺度鬧交！

相片來源：Hugh Han @ Unsplash