港女講日：遠離小人! 讀熟是非精10個面相特徵

三個女人一個墟，再多女人變是非堆!偶像組合成員表面上相處融洽，但暗地互相競爭，博上位難免會有爭執。近日，獲力捧嘅NGT4成員中井莉加於深夜節目《浜ちゃんが！》慨嘆同各成員關係好差，一個朋友都冇。

唔通因為中井被力捧，其他成員眼紅要杯葛佢?中井坦言自己口直心快，「我會批評隊員外表，或者令佢哋反感啦。」

仲加多句:「我做嘢好忙，冇時間記住舞步，佢哋就畀說話我聽!」哦，份人又自我中心，有錯又唔認，又公然講其他成員壞話，呢啲是非精，畀我都唔同佢做朋友啦!

話時話，是非精都有樣睇，一於熟讀以下面相特徵，遠離小人保平安!

1.額窄

代表一個人只會著眼於小處，做事斤斤計較，踩低別人抬高自己，為團隊帶來壓迫感。

2.眉心窄

兩眉之間正常闊度係食指加中指嘅闊度，如果雙眉距離好短，代表其人心胸狹窄、妒忌心強、是非當人情。

3.眉毛上翹

個性小器，唔抵得人哋叻過自己，會不擇手段明刀明槍去搞破壞，因此人緣欠佳。EQ低，經常點火頭，遭人討厭。

4.眼皮下垂

對朋友及同事要求好高，但對自己嘅問題就愛理不理。背後放人冷箭有如家常使飯，仲會主動「分享」其他人是非。

5.眼神閃縮

眼神有閃縮、偷望或斜視習慣嘅人，反映其人心術不正，若果加上三白眼甚至四白眼，一定係奸詐狡猾，常為小事搞風搞雨，搬弄是非之高手也!

6.耳朶發紅

耳紅者氣血浮燥，代表此人自控能力較弱，容易得罪人。

7.鼻樑不正

絕大部分係心術不正之人，詆毀別人唔貶眼，有鑊就卸有功就搶，為個人利益會不擇手段。

8.法令有痣

會主動去惹是生非，見人有好表現會覺得唔開心，想盡方法為難對方，利益之前絕無友情可言。

9.牙齒唔齊

牙齒不整齊牙罅又疏，好易得罪人，又難守秘密，稱得上係「天字第一號是非精」。

10.嘴唇偏簿

唇薄者言薄，最叻老作，無中生有造謠生事，自私自利獨斷獨行，得罪人多稱呼人少。

圖片來源：twitter@rika_nakai823