東張西望｜土瓜灣阿伯疑扮失平衡手踭撞女性 激動舉柺杖迴避黎寬怡追問 兒子回應惹不滿

TVB資訊節目《東張西望》前日（23日）報道近年土瓜灣一帶出現一名87歲伯伯每日遊走街頭，疑似扮失平衡故意用手碰撞路過嘅女性，對象不分年齡，並有店主曾拍到伯伯刻意觸摸女子嘅畫面。《東張西望》攝製隊到訪土瓜灣訪問一眾街坊和受害人，唔少街坊都指伯伯好似故意同人有肌膚接觸，覺得呢種行為係咸濕及猥瑣；受害人王小姐則分享佢曾被伯伯故意觸摸嘅經歷，指而家遠遠見到伯伯就會避開佢。攝製隊為追求真相，連日實地視察，結果多次拍下伯伯疑似出手嘅經過，例如伯伯於一名穿著熱褲嘅女性經過期間，將手臀微微彎曲掃向對方臀部位置。對於伯伯嘅行為，大律師陸偉雄指法庭有可能推論佢係有意非禮女性，而非禮罪係嚴重罪行，最高刑罰為監禁十年。昨日（24日）《東張西望》主持黎寬怡親自訪問伯伯，並搵到伯伯嘅屋企人了解事件。

《東張西望》昨日（24日）播出一集，黎寬怡與工作人員向伯伯詢問知唔知有唔少女性指控自己喺街摸佢哋，伯伯表示係大話；當黎寬怡再追問佢有無咁做嘅時候，伯伯假裝聽力差迴避問題：「唔清楚，聽唔清楚！」。黎寬怡再次喺伯伯耳邊大聲問：「我話呢度好多街坊話你非禮啲女仔，你係咪有手摸佢哋啊？定係唔覺意啊？有無心啊？」伯伯就叫佢哋走，工作人員又再追問伯伯，伯伯即情緒變得激動，仲想舉起柺杖疑似有所動作：「唔應啊！你喺到做咩啊！都唔知你講乜！」攝製隊避免刺激伯伯情緒，只好離開。隨後，一名中年男街坊將黎寬怡拉到一邊，向佢表示冇街坊講呢啲嘢，叫佢唔好信，指伯伯係好人。節目組再派男同事詢問伯伯，伯伯則表示行路一定會掂到。

攝製隊隨後帶同所拍片段到訪伯伯兒子屋企，佢開門接受訪問，否認父親所為並相信父親係唔會非禮人：「你可以這樣子看一下，他是走路走不動的人，然後他走路，肯定要搖擺。走路另外的人，他也不是說，可能也沒有注意，不然的話他會閃一邊稍稍，他就不會搖擺到，他走路，手肯定要這樣，他走不過去啊。」又指伯伯曾被車撞到三次進出醫院，行動不便：「能走路已經很好，那你說這種老人家會對人家構成什麼威脅呢？」伯伯兒子又表示對唔住：「我只能說一句對不起，因為他是個病人，其他的我就無話可說了。」

節目出街後，唔少網民紛紛留言聲討伯伯及不滿兒子包庇其行為，例如「最憎亞伯倚老賣老博大霧！」、「這個老豬手有恃無恐，加上家人既無理縱容包庇，一眾受害者應該報警等警方去處理！」、「絕對唔可以助長呢啲歪風！錯就係錯，為老不尊不知所謂，聽到兒子講廢話更嬲，擘大眼講大話，兩父子一擔擔！」、「非禮就非禮，佢屋企人仲多多藉口，拉佢坐監」、「人以群分，物以類聚，果然是一家人，稍為正常都知個老嘢有問題啦，話唔定個仔都係同類人」、「個仔都有問題，話伯伯企不穩行動會搖擺碰到人，但伯伯只碰到女性不碰到男性咁奇怪，這解釋有埋片誰人會信你唔係非禮」及「絕不可以縱容他！受害人請報警！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！