港姐2023丨祝賀公告揭莊子璇疑似係福建社團監事 阿爸仲係宗親會會長

港姐年年都有是非，今年選完特別多！冠軍莊子璇(Hilary)選前已被傳出係「雙面人」，而落選佳麗胡睿涵Hanna，決賽過後喺IG post咗一張購物袋嘅相，下面寫住「好能裝 像你一樣」，明眼人一睇就知寸緊人扮晒嘢（很會裝），而且玩諧音（裝，莊），矛頭直指莊子璇！另一落選者陳怡名暗示選完有料爆，令網民等住食花生。

估唔到今日莊子璇又有新聞！內地有福建網民喺抖音拍片，話自己條村晉江永和後埔村，出咗位香港小姐。而網上亦流傳一份由「香港福建社團聯會 九龍中分會」發出嘅公告，祝賀莊子璇爸爸莊金勝，個女獲得香港小姐冠軍。

呢份公告下款係「香港福建社團聯會九龍中分會會長王育民」發出，而莊金勝就係「香港錦埔同鄉聯誼會兼香港錦繡錦埔宗親會會長」，更驚人係公告中以「子璇監事」稱呼莊子璇，相信Hilary同福建組織有一定關係。

今年21歲嘅莊子璇喺香港大學修讀食物及營養科學，估唔到未畢業就參與社會同鄉親事務，要履行港姐職責應該冇問題！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！