港姐2024︳陳元元現身江門「投票送海鮮」廣告 網民質疑「這樣選公平嗎？」

今屆港姐經2輪面試後選出25名「初步入圍佳麗」，並於7月5－10日網上舉行《誰是入圍者》投票活動，俾網民投選心水入圍佳麗。投票今日中午截止前，竟然爆出賄選風波！

有網民喺內地社交平台小紅書上載照片，一幅相信係由一間食肆掛上、印有本屆港姐初步入圍佳麗陳元元玉照嘅巨型戶外廣告矗立大廈外牆。廣告上面宣傳「投票選港姐 免費送海鮮」、「凡惠顧臻坊海鮮粥城的顧客，成功投票的免費送海鮮一份」、「本活動7月5日-10日，解釋權歸於臻坊海鮮粥城所有」等語句，而廣告上更印有港姐及tvb.com 標誌。

有網民聲稱係廣告喺廣東省江門市出現，而陳元元湊巧又係來自江門，更巧合係TVB正在舉行由網民投選入圍佳麗嘅網上活動。到底係幫陳元元拉票，定係TVB同內地食肆合作叫食客參與投票？成件事當堂疑點重重。發相嘅網民質疑「港姐這樣選公平嗎？」，但事後已經刪走帖文。

捲入疑似「賄選事件」嘅陳元元(Savannah)今年24歲，身高165cm，報稱職業係可持續發展顧問。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！