港鐵四線齊壞 香港停頓！

香港站去中環站逼爆！

一個早上，四綫全壞。

今朝港鐵四線齊齊故障，加上落雨，情況有幾恐怖？聽下各區線人報料︰

有人由8點鐘去到藍田站，上唔到地鐵，轉去搭巴士咩？打晒蛇餅。有人由黃大仙塞咗1個鐘，只係去到九龍灣。有將軍澳友報料，區內地鐵多人塞爆，巴士亦上唔到車，甚至等好耐都冇車。有荃灣綫嘅朋友想過海，要轉去東涌綫，再由香港站返去中環站，9點前用呢個方法都仲work，9點後已經太多人咁做，結果香港站行去中環站要封……港島嘅朋友表示，成條街的士唔見哂，明知地鐵壞，都唯有逼入閘等地鐵。有真實個案，有人從北角行去路去金鐘。

港鐵車務總監劉天成，今日列車繁忙時間嘅運載力，只有平時一成左右。運房局陳帆見記者時表示，已經調動其他公共交通運輸機構加強服務。但係當馬路都塞實晒，咁可以點？ 而家睇返施政報告提出嘅「水上的士」，似乎真係work。   上次打完風，同今次壞車，都突顯出香港交通系統嘅弱點︰太依賴集體運輸系統？道路設計有問題？   係太多人壞車都走去坐車返工呀！其實除咗服務業要有個人返工嘅工作之外，有邊啲工作係email同電話溝通唔到？咁嘅情況點解仲要咁多人一齊仆返office？港鐵就話慢半怕通知政府，各位老細睇到新聞，係咪可以出個email叫同事work from home？   正所謂居安思危，返工遲到事小， 有咩突發事件要你逃出呢個都市，你有咩辦法？ 今日可能就係考驗你應變能力嘅小測試。 （圖片來源︰香港突發事故討論區 ／ 網友圖片）   【相關搜尋】返唔到工扣假勞工法例