湯怡憑《反黑路人甲》芷珊人氣急升 剖白與初戀情人洪卓立分手原因

無綫劇集《反黑路人甲》正在熱播中，劇集有唔錯收視及口碑，唔少觀眾都大讚內容搞笑兼題材新鮮。當中飾演蘇芷珊嘅湯怡，憑住清純「眼鏡娘」形象人氣急升，深得一眾網民喜愛。早前湯怡接受電台節目《1圈圈星光背後》訪問，有講述佢入行14年嘅經過及剖白與洪卓立（Ken）嘅分手原因。湯怡坦言希望透過《反黑路人甲》可以好似陳家樂咁，憑角色令更加多人認識佢。

原名袁家怡嘅湯怡，2006年參加《美女廚房》嘅美少女廚神而入行，佢初出道時有「少女版黎姿」之稱，甚至喺劇中被安排飾演黎姿角色嘅少女版。英皇同佢簽約後，安排佢去學唱歌做歌手，但最後與歌手夢無緣。另外，由於佢性格比較內向，唔識爭取機會，所以佢試過大半年冇工作零收入，多次想放棄。後來佢開始有機會拍劇，令佢漸漸愛上演戲，2018年仲喺電影《某日某月》首次擔正做女主角。

至於感情方面，佢同洪卓立拍拖11年, 曾經被稱為圈中金童玉女，拍拖期間十分甜蜜，間唔中上載關於佢哋生活點滴嘅相片及短片到社交網站，可惜到2018年11月二人喺網上宣布分手。湯怡大爆阿Ken係佢嘅初戀, 佢話雖然中三時有個男仔向佢示愛，一齊咗2至3個月，但連手仔都無拖過，所以阿Ken係佢第一次正式拍拖。佢話阿Ken比佢更怕醜，講嘢好易臉紅，同時佢又好體貼，喺佢發高燒時會買藥給佢。湯怡仲話佢哋商量咗一年先決定分手，唔係公司棒打鴛鴦，佢哋一齊咁多年，對於一個30歲嘅女仔嚟講，係會想有將來，但同時又會考慮事業，二人商量後決定忍痛分開。 佢哋分手後，再見亦是朋友。湯怡亦感激洪卓立多次為佢護航。湯怡坦言單身兩年都有追求者，不過想以事業行先，感情方面就隨緣。