炎明熹傳被兩間唱片公司招手 或與AGA爭做一姐

炎明熹（Gigi）早前疑因續約問題而被TVB「雪藏」，TVB高層樂易玲曾發布「忘本論」被指疑似暗串，雖然已否認，但炎明熹有意離巢嘅傳聞仍鬧得熱哄哄。繼有傳有內地公司以天價邀請炎明熹過檔，並承諾將佢打造成「G.E.M. 2.0」，近日又有傳已有兩大香港唱片公司向佢招手。

對於有內地公司天價力邀過檔一事，炎明熹出席活動時直言唔知有呢啲消息，不過就承認仍與TVB傾緊合約，指自己有好多想法，並欣然接受唔同轉變，未到末日嗰一日都唔知個結果會點。炎明熹早前曾返內地探訪家人，近日又積極經營社交平台，曾上載到澳門玩樂、家中貓咪「炎三料」嘅照片，又經常cover唔同歌曲，似乎未有太多工作，因而傳出佢決心離巢。

不過，有傳環球唱片及SONY MUSIC已放聲氣表明對炎明熹有興趣，前者旗下藝人包括張學友、陳奕迅、AGA；後者旗下藝人包括蔡依林、鄧紫棋（G.E.M.）。另外，有指環球唱片將重心放喺內地市場，與炎明熹理念相約，有機會與AGA爭奪一姐之位。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！