炎明熹MV網上播放次數被指灌水 觀眾遍及印度土耳其烏克蘭有原因？

以往要睇歌手有幾受歡迎，可能要靠歌曲流行榜成績或者唱片銷量。而家就梗係睇社交平台fans人數或者MV播放次數啦。最近有網友查閱Youtube嘅音樂數據分析工具，發現TVB《聲夢傳奇》出身嘅炎明熹(Gigi)，其歌曲MV收看觀眾當中，有唔少都係來自海外，暗示疑似「灌水」！

根據網友線索，Gigi喺Youtube上面嘅所有歌曲MV播放數，過去28日合共有244萬次，以國家／地區排行的話，香港有97萬次佔最多，但第二三位竟然係華人較少嘅印度（15萬3千次）及土耳其（12萬1千次），另外分別有12萬次來自烏克蘭，10萬5千次來自俄羅斯。

小編再以同樣方法，查看佔據Youtube香港音樂作品播放數（以過去28天計）十大嘅MIRROR（第1位）及張敬軒（第5位）作比較。包含MIRROR團歌及成員個人作品在內嘅MV，喺Youtube嘅觀眾大部份係香港用戶，其次係澳門。MIRROR MV都有來自印度嘅播放點擊，但以次數計只排第9（94600次）。以MIRROR相關作品嘅28天播放數計算，印度觀眾收看比率約佔0.5％。而張敬軒同炎明熹嘅印度收看比率分別約2.66％及6.2％。

再睇埋收看觀眾所在城市分佈，MIRROR嘅MV喺香港同澳門以外，都有唔少係來自華人聚居地如澳洲悉尼、英國倫敦、加拿大Markham、多倫多及溫哥華。軒仔就喺東南亞（吉隆坡、新加坡、台北、大馬新山）較受歡迎。相比之下炎明熹MV收看者當中，香港依然係佔最多（96萬4千次），第2位係澳門（3萬4600次），第3、4位係土耳其伊斯坦堡及秘魯嘅利馬，十大入面仲有烏克蘭基輔、哥倫比亞波哥大等地，同MIRROR及軒仔好唔同。

有網友「盛讚」Gigi歌曲「衝出國際」，亦有人懷疑MV收看數字係咪出現灌水情況。不過從網友留言分析亦可以搵出點解Gigi有咁多「印度聽眾」︰

1，唔少用戶靠vpn翻牆到印度版youtube登記做付費會員，因為收費比香港或其他地區平，而佢地要享用付費會員嘅無廣告播放福利，亦都要翻牆用印度IP先得。所以來自「印度」、「烏克蘭」嘅點擊，唔一定真係有個觀眾喺當地。

2，由於內地睇唔到Youtube，或者有華南沿岸嘅TVB觀眾想喺Youtube睇炎明熹MV，就要靠翻牆。不過以TVB近年同內地視頻平台嘅合作關係，內地用戶唔使翻牆都應該睇得到，所以可能性比較細。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！