無綫力捧「千禧五虎」上位 邊位有機會成為未來一線小生？

以往無綫好興搵個名目力谷一班上位小生，好似80年代就有劉德華、梁朝偉、黃日華、苗僑偉及湯鎮業嘅「五虎將」及2004年將林峯、馬國明、黃宗澤、吳卓羲、陳鍵鋒、黎諾懿包裝成「奧運六星」等等。最近就有傳無綫要力捧余德丞、羅天宇、朱敏瀚、周嘉洛及丁子朗，更被喻為「千禧五虎」，大家又覺得邊位係未來嘅一線小生呢？

余德丞
前香港游泳隊代表余德丞（Dickson），擁有42吋強勁胸肌，曾被封為「巨胸小鮮肉」。2013年加入無綫嘅Dickson備受力捧，但喺2018年8月踢波途中突然心律不正導致昏迷，立即送院搶救，情況一度危殆。好彩Dickson最終大步檻過，而家已經康復。冇再做劇烈運動嘅佢，已經回復幕前嘅工作，除咗為足球節目做主持之外，早前佢仲為青春劇《青春不要臉》孭重飛，首次擔正做男一。

羅天宇
羅天宇於2008年參加香港先生，獲得少年組冠軍後入行，多年嚟佢都係以拍劇為主，雖然都係飾演配角居多，不過仍憑《愛·回家》馬子仁和《跳躍生命線》譚家俊為觀眾熟悉，入屋成功。早前有傳羅媽媽為仔仔打盡人情牌，而成功執三攤獲得《香港愛情故事》男一機會，劇中角色得到觀眾喜愛，更越級挑戰視帝寶座。雖然未能成為視帝，不過獲無綫點名力捧，喺新劇《把關者們》及《十月初五的月光》擔任重要角色。

朱敏瀚
朱敏瀚（Brian）喺中五畢業後就投考藝員訓練班，多年嚟經常飾演某角色嘅「年輕版」、學生及細佬，所以被稱為無綫「御用細佬」。為咗撇甩潺弱形象，幾年前佢努力操肌積極轉型。上年播出嘅劇集中有6套佢有份參與，當中憑《反黑路人甲》「金牌打手」陸秋備受讚賞，更喺《萬千星輝頒獎典禮2020》奪得「飛躍進步男藝員」及「最受歡迎電視拍檔」。

周嘉洛
2015年考入無綫藝員訓練班嘅周嘉洛，入行後喺唔少劇集飾演閒角，近年憑處境劇《愛‧回家之開心速遞》「廢青安」金城安一角深得觀眾喜愛，更憑角色成為無綫最年輕嘅最佳男配角得主。早前傳出佢因獲得賞識，將暫別《愛‧回家》頂替王祖藍做男一，與JW、朱敏瀚及陳瀅合演古裝喜劇。周嘉洛就話已經收到通知，不過就未知幾時開拍。

丁子朗
丁子朗喺2016年參選《香港先生選舉》獲得亞軍，同時獲得「最上鏡先生」及「現場最受歡迎香港先生」。加入無綫後，丁子朗除咗做司儀及主持之外，2018年開始參與劇集拍攝，前年憑《解決師》中飾演中學生高喜俊，獲得觀眾一致好評。近排忙於拍劇嘅佢，已經有4套待播劇（《逆天奇案》、《七公主》、《金宵大廈》及《把關者們》）同埋1套拍攝中嘅劇集《青春不要臉》，明顯備受力捧上位。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！