無綫真人騷《有樓萬事足》 22歲港女：有樓就有高潮

編導岑應製作嘅TVB真人Show一直都話題十足，由《沒女大作戰》、《盛女愛作戰》到「贏在射精前」嘅《沒有起跑線？》都爆出唔少經典人物同金句，下星期播出嘅《有樓萬事足》專講香港人最關心嘅議題－樓。節目未出街先引起網民熱烈討論，當中最吸睛嘅就係只得22歲嘅港女Seasun。Seasun年紀輕輕，目標明確，講明有樓先會嫁，而層樓要有2000呎只係「基本野」。

《有樓萬事足》會喺2月20日一連播出5集，節目圍繞唔同背景、心態嘅香港人千方百計置業嘅話題。其中一個參加者Seasun嘅言論就惹來唔少爭議。Seasun個樣唔差，勝在夠後生身材好，上圍突出又有長腿，都可算有幾分姿色兼且佢目標明確，事關Seasun好清楚知道自己想要啲咩，就係一層至少2000呎嘅樓喇。所以佢講明搵老公一定要有樓，仲叫啲男士「冇樓唔好白撞」，佢仲認為「男方買樓係表達愛嘅方法」添。

事隔一日，一班參加者出席節目活動，司儀再爆出Seasun於節目內嘅金句，就係:「有樓就有高潮」，金句一出，現場人士即時「嘩」一聲，Seasun就表示有樓就有安全感，女人有安全感就會有高潮，唔知各位絲打又認唔認同呢?

佢嘅言論仲嚇到在場嘅坤哥吳業坤話只可以同呢種女士做朋友。

不過節目都搵到唔同類型嘅港女發聲，其中32歲港女Inky靠自己上樓，仲唔介意另一半冇樓，目前正「有樓招親」，希望搵到真愛。唔知巴打們又點睇呢？