無綫綠葉演員江富強8月完約 身兼多職為養家

綠葉演員老是常岀現，但有幾多位大家真係記得佢個名呢？好似你未必知道江富強係邊個，但你一定記得佢個樣。現年58歲嘅江富強，喺30年前加入動作藝員訓練班，參與唔少嘅劇集，例如有《烈火雄心3》、《鐵探》、《福爾摩斯奶》、《大帥哥》等等，而喺播映中嘅《牛下女高音》有份參演，佢喺劇中飾演大爆（吳岱融飾）酒吧一位連名都冇嘅熟客仔。

好多行內人都知江富強左右手及面上都有疤痕，所以佢亦有另一個稱呼叫做「刀疤」。喺加入無綫之前，佢已經參與好多電影製作，會幫手負責電影嘅動作設計，同時間亦會做助理指導。佢仲好記得自己首部作品《獄中龍》，就已經要同四大天王嘅劉德華有一場打架戲。戲中江富強唔小心真係打到華仔，華仔唔單止冇責怪佢，仲叫佢放心去演呢一場戲。除咗華仔呢位巨星要多謝之外，另外佢要多謝嘅就係周潤發（發哥）。因為拍攝《監獄風雲II逃犯》時，佢要擔任林嶺東嘅替身跳崖，但唔小心拗柴，最後由發哥幫忙扶上救護車。

其實入行多年，參與嘅劇集及電影真係多過200部以上，好多時飾演閒角收入都會較唔穩定。有3名仔女嘅江富強，間中會做司機或保鑣等唔同嘅兼職養妻活兒。原來江富強喺8月已經同無綫完約，雖然呢刻未知道可唔可以繼續被續約，但係為人積極嘅佢，覺得如果唔能夠成功續約都可以「東家唔打打西家」，就算要佢轉行都無所謂，未知日後我哋仲可唔可以喺無綫見到佢呢？