雅虎香港新聞 
父親不敵癌魔病逝 袁偉豪傷痛欲絕：子欲養而親不在…
袁偉豪父親與癌病搏鬥多年，近年擴散至肝部，無藥可施，袁偉豪只能盡孝子本份，工作之餘全心全力照顧家人，珍惜與父親相處的最後時光。惜袁爸爸最終不敵病魔離世，傷心欲絕的袁偉豪在社交網寫下沉痛感言：「樹欲靜而風不止 子欲養而親不在」
原文：東方新地｜圖片：IG benontheroad
延伸閱讀：
【兒童高危】本港確診麻疹個案 症狀像感冒 潛伏期可長達21天
親子好去處 全港最大LINE FRIENDS Store空降apm 全球首個Snack Bar + BT21 率先睇！
袁偉豪父親不敵癌魔病逝
「樹欲靜而風不止 子欲養而親不在 爸爸永遠懷念您」袁偉豪的爸爸與癌病搏鬥多年，最終不幸在凌晨時份離世。傷心欲絕的袁偉豪在社交網站公布父親離世的消息，寫下感言及上載多張與父親的合照、以及父親年輕時的照片。袁偉豪又叫爸爸好好休息：「放心，媽媽交給我吧。」
A post shared by Benjamin Yuen (@benontheroad) on May 16, 2018 at 10:06am PDT
袁偉豪：你是我心目中最堅強的爸爸
人稱泰哥的袁偉豪爸爸，從前是一名警察，從袁偉豪上載的照片可見袁爸爸年輕時一臉英氣，當中有其穿上警察制服的舊照，亦有一家人的家庭照。袁偉豪稱爸爸是一位為市民服務的好警察，又寫道：「你是我心目中最堅強的爸爸，辛苦你了。不再痛苦，好好休息。」
袁偉豪拍拖盡孝心
本刊記者早前影到袁偉豪陪爸爸飲茶，問佢爸爸依家情況點？袁偉豪當時答：「爸爸嘅病情好反覆，有時夜晚會呼吸困難，抖唔到氣，依家唔使住院，因為身體虛弱冇任何治療可以再做，亦食唔到嘢，只靠營養奶粉。依家都係一有時間就陪爸爸，同屋企人有共識，想全天候都由親人照顧佢，唔想佢因為我哋疏忽而跌親受傷，媽咪做埋呢個月就退休，佢都會好辛苦，所有一有時間就陪吓佢哋，想盡量做好啲。」
係咪搵過晒啲偏方去醫爸爸？袁偉豪表示：「有段時間係，朋友亦有好多偏方提議，不過依家唔敢試，佢唔係癌症初期，未必承受到。依家keep住睇中醫，爸爸心態上好堅強，我做仔亦會全力support佢。聽到佢有時講好辛苦會唔開心，佢話瞓唔到，我會好擔心。又會諗番起以前細嗰嘅嘢，見完佢返到屋企靜落嚟會好心嗡。」
認有經濟壓力
問佢呢幾年忙工作有冇忽略屋企人？袁偉豪話：「坦白講，雖然大時大節有返去食飯，但呢兩年真係好忙，我錯失咗好多嘢，嫲嫲過身、啲貓貓狗狗要走，見唔到佢哋最後一面，我喺事業上好拚搏，有得亦有失。總之依家私人時間都會拎出嚟陪家人，好似畀你哋影到呢次，我都係去相熟酒樓搵間房同屋企人飲茶，希望有個舒服嘅空間。」
提及爸爸嘅醫藥費都係佢負責？袁偉豪答：「早幾年佢有保險，近年醫藥費同生活費都交畀我，屋企人對我嚟講好重要，我仲有能力，又係長子，頂得住。」經濟上壓力都好大？係咪為搵錢養家好努力工作？袁偉豪直言：「呢個都係㗎！好彩我有個好好嘅經理人，佢幫我喺開新劇前接咗好多出面嘅搵錢job，亦多謝好多客戶肯用我。
壓力大甩頭髮
心理壓力大唔大？袁偉豪話：「呢個月心情好沉重，大家都睇到我個樣好唔開心，仲甩咗好多頭髮，有壓力所以甩多咗。坦白講，好難每個場合都咁完美、咁寬容去面對，有時出席活動對住鏡頭笑完，再見到fans我已經冇晒心機，唔想刻意去扮開心。怕唔怕會有情緒病？我覺得自己處理到，不過近排有啲宣傳訪問都推咗，連買咗嘅Burno Mars飛都送咗畀人，真係冇心情，有時唔想見人。」
延伸閱讀：
