牛肉丼新選擇!日本燒牛丼元祖登陸旺角 最平$45

·3 分鐘文章

牛肉丼一向都係香港人嘅comfort food,最新又有間日本牛丼登陸喇,仲要係被譽為燒牛丼元祖嘅東京チカラめし,各位粉絲相信都餓咗好耐了。

呢間喺日本有超過10年歷史,現時分別喺東京、大阪同千葉縣有3間分店嘅牛丼店,嚟到香港,由日本品牌方同港資公司千源集團合作開設。餐廳選址旺角,無論格局、食材來源、烹調方法都似足日本,主打多達35款日式燒牛肉丼、燒豚肉丼同其他定食,價錢尚算親民,最平$45就食到。

 招牌燒牛肉丼
招牌燒牛肉丼

招牌燒牛肉丼(並:$45、大:$55)

呢個品牌嘅牛肉丼,最大特色莫過於唔係以傳統汁煮牛肉丼,而係用鐵板燒即叫即烤嘅方式處理,燒至微焦後再淋上特製醬汁。首推當然要試招牌燒牛肉丼,以美國牛腹脅肉製作,肉味較濃而口感亦較緊實。加埋洋蔥、菠菜、芝麻粒等,淋上日本直送嘅獨家配方特製醬汁,既有麻油香味,亦有濃香帶甜嘅醬油香。以往慣咗加牛汁嘅朋友仔,今次唔使加都夠晒味。而26/6會推出重量燒牛肉飯,牛肉份量比起普通版多成60%!

芝士燒牛肉丼
芝士燒牛肉丼

芝士燒牛肉丼(並:$55、大:$65)

芝士控可能會想試芝士燒牛肉丼,面層加上Mozzarella芝士碎同巴馬臣芝士粉,以火槍燒至半溶微焦狀態,灑埋黑椒,係香口嘅,不過整體味道感覺偏濃咗少少,可能食開濃味嘢食嘅朋友仔就會啱啲。

燒豚肉丼
燒豚肉丼

燒豚肉丼(並:$45、大:$55)

除咗牛丼之外,都仲有豬同雞嘅。燒豚肉丼選用嚟自荷蘭嘅豚肉,五花腩部位製作,肉質嫩滑爽口。同樣都係加入洋蔥喺鐵板燒上即烤。

鹽燒豚肉丼
鹽燒豚肉丼

鹽燒豚肉丼 (並:$45、大:$55),配生玉子加$10

另外推介鹽燒豚肉丼,醬汁換上日本直送嘅鹽燒醬汁,加入大量蔥絲,又係另一番風味。開飯仔更有個私心推介食法,加配多隻生玉子,喺飯嘅中間開個窿,倒落去再拌勻。嚟自日本達可供生食級別嘅生玉子,蛋黃呈深橙紅色,蛋白亦較黏,撈勻後每啖都即刻變得香滑咗,多咗重蛋香層次更豐富。

野菜燒牛肉定食
野菜燒牛肉定食
東京チカラめし
東京チカラめし

東京チカラめし
地址: 旺角奶路臣街17號The Forest 地舖

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能