狗公出没注意 O Camp獸父搵食新招

踏入8月中，各大專院校嘅O Camp日子又再接近，每年一到呢時間，彷彿已經可以聽到一班豺狼喺度張牙舞爪嘅聲音，無錯，就係一眾O Camp組爸已經磨拳擦掌，準備變身獸父，向一班剛入大學嘅女同學埋手！O Camp呢個活動，近幾年已經被傳媒批評得體無完膚，種種變態遊戲呈現於大眾眼前，成為唔少人談論嘅話題，更成為社會焦點之一。加上「O Camp獸父」呢個名稱嘅興起，唔少女同學都非常警覺；所以今時今日，獸父出手搵食，真係好似廣告咁講：「宜家無咁易架喇！」一不小心被人冠上「狗公」之名隨時一世英明盡喪，不過縱然難度提高，仍然無阻人類嘅獸性、男性荷爾蒙主宰嘅理性，只不過招數方面有所更改。騙徒手法層出不窮，一齊睇下以下幾個情況你有冇試過？

不再獻殷勤，轉玩Mean

從前嘅嘘寒問暖嘅做法，除非你靚仔到周柏豪咁樣，否則一出手已經畀人當「狗公」辦啦，所以溫柔路線唔Work架喇；獸父目前多採用外剛內柔嘅招式，表明上不停取笑你，特別同你講啲Mean嘢令你同佢鬥嘴，行歡喜冤家路線，不過適當時候就會變番關心Mode，等你知道佢溫柔體貼嘅一面。

幽默風趣，冷面笑匠

仲特登講無厘頭嘢搞笑？你估仲係周星馳年代咩，而家一個二個獸父要扮Cool但又要展現自己風趣幽默，所以9成9行冷面笑匠路線，即係點？即係林日曦囉，黑口黑面，但突然講啲好笑嘢（或自以為好笑嘢）。不過呢條路線風險好高，玩得好就話啫，做唔好就兩頭唔到岸，畀人話傻仔呀。

聯群結黨，互相介紹

一隻狼唔得人驚，但一班狼就勢力加倍！從前獸父有目標，通常都係自己組嘅女仔，一定自己收埋驚死其他組嘅人搶；時移世易，宜家多數聯合其他獸父，一方面共抗其他組仔；二方面可以互相介紹對方組嘅女仔。呢個做法亦方便之後Re U可以更容易叫晒大家出去，令人放低戒心。