獨家消息：好嘅唔靈醜嘅靈！ 陳家樂腹痛入院 連詩雅請假服侍

藝人陳家樂前日收工時突然劇痛難耐，送院作全身檢查，幸無大礙。身為未婚妻的連詩雅自然擔心不已，昨日全程照顧及親接家樂出院。而為免影響工作，家樂今晚便復工，態度專業。

陳家樂與連詩雅（Shiga）將於4月拉埋天窗，近月忙於搵老婆本的家樂，曾同時為英皇電影《衝鋒》及無綫劇《異空感應》開工，農曆新年前後可謂忙到氣咳。身為未婚妻的Shiga前晚出席婚紗活動時，更明言知道家樂於《異》劇內有大量動作場面，惟恐對方受傷，想不到「好嘅唔靈」，家樂前日收工時便因肚腹劇痛，即被送往醫院留醫！

據悉，家樂數日前已開始感到肚腹陣痛，但由於《異》劇正進入殺青階段，為免影響劇組進度，惟有死撐繼續開工，然而「身體最誠實」，前日傍晚收工時開始痛楚難耐，他在助手陪同下往醫院求醫。消息傳出後令經理人公司及劇組擔心不已，進院初期未能第一時間找出痛楚根源，最後主診醫生要求家樂留醫作全身檢查，昨日的工作通告則臨時取消。

搞婚禮爆發小宇宙

經過一晚休息及檢查後，家樂狀況已見轉好，他回覆記者表示：「冇咩事呀，做咩咁擔心？食錯嘢腸胃炎咋。」Shiga卻肉痛非常，昨日請假專心照顧未婚夫，更親到醫院接對方出院。家樂則暫定今晚復工，身為其《異》劇拍檔的陳曉華則表示：「我嗰日收早，唔知道佢入咗院，希望佢冇事啦。」

另外，Shiga在活動中透露要待家樂的劇集殺青，以及拍畢婚紗照後才對外公布確實婚期。談到只剩下兩個月作籌備，她坦言：「家樂開工冇時間，暫時我搞住先。（情人節佢都要工作，你會唔會唔開心？）工作要緊，知佢都拍得辛苦，經常要攀山涉水，驚佢會受傷，希望佢順利同安全拍完。」因要獨力籌辦婚事，竟變相令Shiga爆發小宇宙：「發現自己有呢個能力，將來可以做生意，過程中學到好多嘢。」

至於婚紗方面，她透露仍未落實：「依家我唔可以太瘦，但又唔可以肥，唯有健身同人手按摩雙管齊下，令身材變到應有嘅地方有，應冇嘅就冇。（出埠影婚紗相？）冇時間，但曾經諗過自己搭建沙灘景或露營景去影，我仲想扮美少女戰士同禮服蒙面俠影相，但畀朋友強烈反對。」